جی ٹونٹی سربراہی اجلاس: چینی صدر دہلی نہیں آئیں گے

نئی دہلی//
بینگ نے سرکاری طور پر اس بات کی تصدیق کی ہے کہ دہلی میں آئندہ ماہ ہونے والے جی ٹونٹی سربراہی اجلاس میں چین کے صدر‘ شی جن پنگ شرکت نہیں کریں گے ۔
بیجنگ کی نمائندگی اس کے وزیر اعظم لی کیانگ کریں گے ۔
سربراہی اجلاس نئی دہلی میں۹ سے ۱۰ ستمبر کو ہو گا ۔
ایک رپورٹ میں کہا گیا ہے کہ مستند ذرائع کے مطابق چینی وزیر اعظم لی کیانگ ۵ سے ۷ستمبر کو جکارتہ میں۴۳ویں آسیان سربراہی اجلاس میں شرکت کے بعد براہ راست نئی دہلی جائیں گے۔ وی وی آئی پی طیاروں کے لیے پرواز کے منصوبے درج کر دیے گئے ہیں حالانکہ وزارت خارجہ کی طرف سے ابھی تک سرکاری اطلاع کا انتظار ہے۔
بھارت کی طرف سے ابھی تک اس سلسلے میں کوئی وضاحت نہیں کی گئی ہے۔ علاوہ ازیں وزارت خارجہ نے بھی سربراہی اجلاس میں شی جن پنگ کی عدم شرکت کی باضابطہ تصدیق نہیں کی ہے۔
روسی صدر پوتن پہلے ہی اس بات کی تصدیق کر چکے ہیں کہ وہ نئی دہلی میں ہونے والے جی ۲۰سربراہی اجلاس میں شرکت نہیں کریں گے۔ ان کی جگہ وزیر خارجہ سرگئی لاوروف ماسکو کی نمائندگی کریں گے۔
قابل ذکر ہے کہ جی ۲۰سربراہی اجلاس کو صدر شی جن پنگ اور امریکی صدر بائیڈن کے لیے اپنے تعلقات کو بہتر کرنے کے ایک موقع کے طور پر دیکھا جا رہا ہے جو مختلف تجارتی اور جغرافیائی سیاسی تنازعات کی وجہ سے انتہائی کشیدہ ہیں۔
شی کی بائیڈن کے ساتھ آخری ملاقات اور بات چیت نومبر ۲۰۲۲میں انڈونیشیا کے بالی میں جی۲۰سربراہی اجلاس کے دوران ہوئی تھی۔