ہمارے ائمہ و خطبا سند یافتہ ہونے چاہئیں: اندرابی

سرینگر///
جموں کشمیر وقف بورڈ کی چیئرپرسن‘ڈاکٹر درخشاں اندرابی کا کہنا ہے کہ ہمارے ائمہ اور خطبا کا سند یافتہ ہونا لازمی ہے تاکہ وہ دین کی اچھی تشہیر اور قوم کی صحیح سمت میں رہنمائی کر سکیں۔
اندرابی نے کہا کہ جموںکشمیر میں کئی دارلعلوم قائم ہیں جہاں طلبا کو مفتی بننے کی تعلیم دی جا رہی ہے اور بچوں کا حافظ قرآن بھی بنایا جا رہا ہے ۔
بتادیں کہ جموں وکشمیر وقف بورڈ نے کچھ زیارت گاہوں اور مساجد میں ائمہ، خطبا اور موذنین کی تقرریوں کیلئے خواہشمند امیدواروں سے درخواستیں طلب کی ہیں۔
وقف چیئرپرسن نے یہاں ہفتے کو اس سلسلے میں پوچھے گئے ایک سوال کے جواب میں کہا’’جب ہم علم اور دین کی بات کرتے ہیں تو ہمارے ائمہ اور خطبا کے پاس اچھی ڈگریاں ہونی چاہئیں تاکہ ہم دین کے معاملے میں کمزور نہ رہ سکیں‘‘۔
اندرابی کا کہنا تھا کہ یہاں کئی یونیورسٹیاں اور دارلعلوم ہیں جہاں مفتی بننے کی تعلیم دی جا رہی اور بچوں کا حافظ کلام اللہ بھی بنایا جاتا ہے ۔انہوں نے کہا کہ ہمارے ائمہ اور خطبا کا سند یافتہ ہونا ضروری ہے ۔
وقف چیئر پرسن نے کہا کہ وقف بورڈ کی جتنی بھی زیارت گاہیں ہیں مساجد ہیں وہاں ائمہ خطبا اور موذنین اچھے ہونے چایئے تاکہ وہ دین کی اچھی تشہیر کر سکیں اور قوم کی بھی صحیح سمت میں رہنمائی کر سکیں۔ انہوں نے کہا کہ اگر میری مخالفت ہوگی تو مجھے کوئی غم نہیں ہے لیکن ہم قوم کو صحیح سمت دینے کے لئے کام کرتے رہیں گے ۔