مرکز کی سرینگر اور شارجہ میں ہفتے میں پانچ پروازوں کی منظوری

سرینگر//
مرکزی شہری وزارت ہوا بازی نے گو فرسٹ ائیر لائنز کو سرینگر سے شارجہ کے درمیان ہفتے میں پانچ بار پروازیں چلانے کو منظوری دی ہے ۔
یہ پیش رفت سرینگر اور شارجہ کے درمیان راست پروازوں کا سلسلہ بند ہونے کے کئی مہینوں کے بعد ہوئی ہے ۔
بتادیں کہ سرینگر اور شارجہ کے درمیان آخری پرواز رواں برس کے ماہ جنوری کے آخر میں چلی تھی اور اس کے بعد یہ سلسلہ معطل ہوا تھا۔
بتایا جاتا ہے کہ سرینگر سے شارجہ کے درمیان راست پروازوں کا سلسلہ اگلے ایک ماہ کے دوران بحال ہونے کی توقع ہے ۔
جموں وکشمیر کے لیفٹیننٹ گورنر منوج سنہا نے جمعے کے روز اپنے ایک ٹویٹ کے ذریعے اعلان کرتے ہوئے کہا کہ وزارت شہری ہوا بازی نے سرینگر سے شارجہ کے درمیان ہفتے میں پانچ پروازوں کو آپریٹ کرنے کو منظوری دی ہے ۔
سنہا نے ٹویٹ میں کہا’’میں اس کیلئے عزت مآب وزیر اعظم شری نریندر مودی کا بے حد مشکور ہوں‘‘۔
لیفٹیننٹ گورنر کا اپنے ایک اور ٹویٹ میں کہنا تھا’’یونین ٹریٹری انتظامیہ، حکومت ہند (وزارت ہوا بازی) اور عزت مآب وزیر شری جے ایم سندھیا سیاحت اور صنعت کے شعبوں کے فروغ کیلئے ہوائی رابطے کو مضبوط بنانے کے تئیں ترجیحی بنیادوں پر ضروری اقدام کر رہے ہیں‘‘۔
بتادیں کہ مرکزی حکومت نے سال گذشتہ کے ماہ اکتوبر میں سری نگر سے شارجاہ کے درمیان براہ راست پروازیں شروع کی تھیں۔
مرکزی وزیر داخلہ امیت شاہ نے سال گذشتہ کے ۲۳؍اکتوبر کو اس شارجاہ فلائٹ کو جھنڈی دکھا کر روانہ کیا تھا۔
بتایا جاتا تھا کہ اس سروس سے جموں وکشمیر میں شعبہ سیاحت کو کافی فروغ ملے گا۔لیکن یہ سروس اس وقت مشکلات کا شکار ہوئی تھی جب پاکستان نے یہ دس روز بعد ہی اپنے فضائی حدود استعمال کرنے کی اجازت نہیں دی تھی۔نیشنل کانفرنس کے نائب صدر اور سابق وزیر اعلیٰ عمر عبداللہ نے پاکستان کے اس فیصلے پر افسوس ظاہر کیا تھا۔