چین میں سمندری طوفان کے زیر اثر بارشوں نے تباہی مچادی، سڑکیں دریاؤں میں بدل گئیں

بیجنگ//
چین میں سمندری طوفان کے زیراثر طوفانی بارشوں نے تباہی مچادی، منہ زور سیلابی ریلے گاڑیوں سمیت راستے میں آنے والی ہر شے بہا لے گئے۔غیر ملکی میڈیا رپورٹس کے مطابق حالیہ بارشوں کے باعث بیجنگ کے ہوائی اڈوں پر سیکڑوں پروازیں منسوخ اور تاخیر کا شکار ہیں، متاثرہ علاقوں سے ہزاروں افراد شیلٹرز ہوم میں پناہ لینے پر مجبور ہوگئے۔
رپورٹس میں بتایا گیا ہے کہ شدید بارشوں کی وجہ سے مختلف حادثات میں 2 افراد ہلاک ہوگئے ہیں۔طوفانی بارشوں سے دارالحکومت بیجنگ، تیانجن اور ہیبائی کے کئی علاقے شدید متاثر ہوئے ہیں، سڑکیں دریاؤں میں بدل گئیں، تیز رفتار پانی سب کچھ بہا لے گیا، منہ زور سیلابی ریلوں میں گاڑیاں تنکوں کی طرح بہہ گئیں، سیکڑوں افراد پانی میں گھرے علاقوں میں پھنس گئے۔رپورٹس کے مطابق بیجنگ میں جاری طوفانی بارشوں کے ریڈ الرٹ کے بعد ہزاروں افراد نقل مکانی کر چکے ہیں، شہر کے دونوں ہوائی اڈوں پر200 سے زائد پروازیں منسوخ اور 600 سے زائد تاخیر کا شکار ہوئی ہیں۔
اس کے علاوہ شہر کی 350 سے زائد شاہراہیں شدید بارش سے متاثر ہوئیں ہیں۔
واضح رہے کہ سمندری طوفان ڈوکسری جمعے کو چین سے ٹکرایا تھا، چینی محکمہ موسمیات نے رواں ہفتے ایک اور سمندری طوفان چین سے ٹکرانے کی پیش گوئی کی ہے۔