سمجھ نہیں آرہا ہے اور… اور بالکل بھی نہیں آرہاہے کہ … کہ عقل کے ان اندھوں کی سمجھ میں یہ بات کیوں نہیں آ رہی ہے کہ مرکز نے کبھی بھی کشمیر… جموں کشمیر کے اسمبلی انتخابات کو امن و قانون میں بہتری کے ساتھ نہیں جوڑا تھا… نتھی کردیا تھا… مشروط کیا تھا… جہاں تک ہماری یاد داشت کا تعلق ہے ‘ ہمیں یاد نہیں آرہا ہے اور… اور بالکل بھی نہیں آرہا ہے کہ مرکز نے کب ان انتخابات کو امن و قانون کے ساتھ جوڑ دیا تھا جو عقل کے اندھے کہہ رہے کہ اب تو ۸ ؍اور ۱۰ محرم کے جلوس بھی سرینگر میں بر آمد ہوئے‘ اب تو حکومت بھی ان جلوسوں کو کشمیر میں امن و قانون کی بحالی اور بہتری کا ثبوت مان رہی ہے…تو پھر دیر کس بات کی ‘ مرکز کشمیر میں الیکشن کا اعلان کرے نا! اب آپ ہی بتائیے کہ ہم ان عقل کے اندھوں کو کیا کہیںکہ … کہ یہ سچ میں عقل کے اندھے ہیں جو ان کی اس نا سمجھ‘ سمجھ میں یہ بات سمجھ نہیں آرہی تھی کہ مرکز نے … امیت بھائی شاہ نے کبھی بھی ‘ کسی بھی مقام پر یہ نہیں کہا کہ کشمیر میں حالات بہتر ہوں گے تو اسمبلی الیکشن کئے جائیں … انہوں نے ایسا کچھ نہیںکہا تھا اور… اور ہم یہ حلفاً بیان کرتے ہیں… امیت بھائی شاہ نے صرف اتنا کہا تھا اور… اور وہ آج بھی اس بات پر قائم ہیں کہ جموںکشمیر میں ایک مناسب وقت پر الیکشن کئے جائیں گے… ایک مناسب وقت پر …تو یہ مناسب وقت کب ہو گا…اس بات کا فیصلہ امیت بھائی شاہ کو کرنے دیجئے نا … یہ ان کا کام ہے‘ ان کی ڈیوٹی ہے… ان کا فرض … ان کی ذمہ داری ہے اور… اور ان کی ذمہ داری انہی کو نبھانے دیجئے نا…آپ اپنا سر کیوں کھپا رہے ہیں…امیت بھائی شاہ اگر آج سے دس سال بعد بھی کہیں گے کہ ابھی کشمیر میں مناسب وقت… اسمبلی الیکشن کیلئے مناسب وقت نہیں آیا ہے تو… تو بتائیے کہ آپ ان کا کچھ بگاڑ سکتے ہیں کیا؟نہیں نا !کیونکہ امیت بھائی شاہ ملک کے مائی باپ ہیں‘ وزیر داخلہ ہیں… فیصلہ انہیں کرنا ہے کہ وہ مناسب وقت کب آئے گا جب کشمیر میں اسمبلی الیکشن ہوں گے… کبھی آئے گا بھی یا نہیں… ان کی رائے ہے کہ فی الحال وہ وقت … مناسب وقت نہیں آیا ہے توایسا ہی سہی کہ… کہ فی الحال سیاحت کیلئے مناسب وقت‘ امر ناتھ یاترا کیلئے مناسب وقت ہے‘ محرم کے جلوسوں کیلئے مناسب وقت ہے‘ جی ٹونٹی کیلئے مناسب وقت ہے‘بالی ووڈ فلم شوٹنگ کیلئے مناسب وقت ہے ‘بلدیادتی اداروں کے الیکشن کیلئے مناسب وقت ہے… اور ہاں کل کو لوک سبھا الیکشن کیلئے بھی وقت مناسب ہو گا… لیکن اسمبلی الیکشن کیلئے وقت مناسب نہیں ہے… اور ان عقل کے اندھوں کو جتنی جلدی یہ بات سمجھ میں آجائے اتنا ہی اچھا ہے… ان کیلئے اور ہاں ہمارے لئے بھی ۔ ہے نا؟
