محمد بن سلمان اور جیک سلیوان کا جدہ میں تزویراتی تعلقات پر تبادلہ خیال

الریاض //
سعودی ولی عہد شہزادہ محمد بن سلمان نے جمعرات کو امریکی قومی سلامتی کے مشیر جیک سلیوان کا جدہ میں استقبال کیا۔ دونوں رہنماؤں نے دو طرفہ تعلقات اور مشترکہ دلچسپی کے امور پر تبادلہ خیال کیا۔
سعودی پریس ایجنسی کے مطابق جدہ میں ملاقات کے دوران ولی عہد اور سلیوان نے دونوں ممالک کے درمیان سٹریٹجک ریلیشن شپ اور مختلف شعبوں میں تعاون بڑھانے کے ذرائع کا جائزہ لیا۔
رپورٹ میں مزید کہا گیا کہ محمد بن سلمان اور جیک سلیوان نے تازہ ترین علاقائی اور بین الاقوامی پیش رفت پر بھی تبادلہ خیال کیا۔ ملاقات میں دونوں اطراف کے اعلیٰ وفود موجود تھے۔وائٹ ہاؤس نے ملاقات کے بارے میں ایک بیان جاری کیا جس میں کہا گیا ہے کہ محمد بن سلمان اور جیک سلیوان نے دوطرفہ اور علاقائی معاملات اور مشرق وسطیٰ کے خطے کے لیے اقدامات پر تبادلہ خیال کیا۔ دونوں رہنماؤں نے یمن سمیت مختلف ملکوں کی صورت حال پر بھی گفت و شنید کی۔