یونان کے روڈس جزیرے میں جنگل کی آگ میں اضافے کا خدشہ

یونانی ماہرین موسمیات نے پیش گوئی کی ہے کہ روڈس جزیرے کے تیز ہواؤں کی زد میں آنے کے آثار ہیں، جس سے جنگل کی آگ پر قابو پانے میں فائر فائٹرزکے لئے رکاوٹ پیدا ہونے کا خدشہ ہے، جہاں سے تقریباً 30 ہزار افراد کو محفوظ مقامات پر منتقل کیا گیا ہے۔
یہ ملک طویل عرصے سے شدید گرمی سے نبرد آزما ہے اور تقریباً ایک ہفتے سے جزیرے پر آگ کے شعلے بھڑک رہے ہیں۔ یہ جزیرہ یونان کے مشہور سیاحتی مقامات میں سے ایک ہے، خاص طور پر برطانوی، جرمن اور فرانسیسی سیاحوں کے لیے۔ گزشتہ سال ایک لاکھ سے زائد آبادی والے اس جزیرے میں تقریباً 25 لاکھ سیاح آئے تھے۔ حکام نے خبردار کیا ہے کہ سیاحت کے عروج والے موسم کے دوران آگ کے شعلوں پر قابو پانے کی جدوجہد میں کئی دن لگیں گے۔
فائر ڈپارٹمنٹ کے ترجمان واسلیس واتھراکوئینس نے خبردار کیا کہ اتوار تک ہوائیں "زیادہ شدید” ہو جائیں گی، جو آگ کے شعلوں کو بھڑکا سکتی ہیں۔جزیرے کے مقامی حکام نے ہفتہ کو کہا کہ انہوں نے جنگل کی آگ سے خطرے میں پڑنے والے 30 ہزار افراد کو محفوظ مقامات پر منتقل کیا ہے۔
آگ رات کے وقت لیما گاؤں تک پہنچ گئی، جس نے گھروں اور ایک چرچ کو اپنی لپیٹ میں لے لیا، جب کہ ساحل تک پہنچے آگ کے شعلوں سے کئی ہوٹلوں کو نقصان پہنچا۔ سیاحوں اور کچھ مقامی لوگوں نے رات جزیرے پر جموں، اسکولوں اور ہوٹلوں کے کانفرنس سینٹرز میں گزاری۔
آرچنجیلوس ویلج کونسل کے سربراہ پیناگیوٹس ڈیمیلس نے اسکائی ٹی وی کو بتایا کہ "یہ جزیرے کے لیے ایک بے مثال صورتحال ہے۔‘‘ انہوں نے کہا کہ بہت سے مقامی لوگ سیاحوں کی مدد کے لیے پہنچ گئے تھے۔وزارت خارجہ نے کہا کہ جنگل میں لگنے والی آگ کی وجہ سے غیر ملکی شہریوں کے انخلا کی سہولت کے لیے ہنگامی خدمات شروع کی گئی ہیں۔ فائر بریگیڈ کے عملے نے رات میں آگ پر قابو پالیا جبکہ اتوار کی صبح فضائی مدد شروع کردی گئی۔