لارڈز ٹیسٹ تنازع، ایم سی سی نے تین ارکان کو سزا دے دی

لندن// میری لیبون کرکٹ کلب (ایم سی سی) نے لارڈز ٹیسٹ میچ میں وقفے کے دوران آسٹریلوی کھلاڑیوں سے بدکلامی اور الجھنے پر تین ممبران کو معطل کردیا۔
لارڈز ٹیسٹ میچ کے آخری روز جونی بیرسٹو کے متنازع رن آؤٹ پر ایم سی سی کے چند ممبرز نے لانگ روم میں آسٹریلوی کھلاڑیوں کے خلاف نعرے لگائے تھے اور بدزبانی کی تھی۔
ایم سی سی نے واقعے پر کرکٹ آسٹریلیا سے معافی مانگتے ہوئے مزید تحقیقات کا فیصلہ کیا ہے۔
واضح رہے کہ لانگ روم میں ایم سی سی کے ارکان آسٹریلوی کرکٹر عثمان خواجہ اور ڈیوڈ وارنر سے الجھ پڑے تھے۔
یاد رہے کہ لارڈز ٹیسٹ کے پانچویں روز الیکس کیری نے جونی بیئرسٹو کو متنازع طریقے سے رن آؤٹ کر دیا تھا، فیلڈ امپائر کی جانب سے فیصلہ تھرڈ امپائر کی جانب بھیجا گیا اور تھرڈ امپائر نے انگلش بلے باز کو آؤٹ قرار دیدیا۔
آسٹریلین کھلاڑیوں کو انگلش وکٹ کیپر بلے بازجونی بیئرسٹو کو رن آؤٹ کرنے پر شدید تنقید کا سامنا کرنا پڑا۔
برطانوی میڈیا کے مطابق کھانے کے وقفے کے دوران انگلش شائقین کی جانب سے آسٹریلین کھلاڑیوں کے خلاف نعرے بازی کی گئی۔