ایشیا کپ کا آغاز 31 اگست سے ہوگا

دبئی// ون ڈے فارمیٹ میں کھیلی جانے والی ایشیا کپ ٹورنامنٹ 2023 31 اگست سے شروع ہوگی جبکہ اس کا فائنل 17 ستمبر کو کھیلا جائے گا۔ ایشین کرکٹ کونسل (اے سی سی) نے جمعرات کے روز اس کا اعلان کیا۔
پاکستان کرکٹ بورڈ (پی سی بی) کے تجویز کردہ ‘ہائبرڈ ماڈل’ کی اے سی سی سے توثیق کے بعد ٹورنامنٹ کا آغاز پاکستان میں چار میچوں سے ہوگا۔ اس کے بعد ٹورنامنٹ آخری نو میچوں کے لیے سری لنکا منتقل ہوگی۔
قابل ذکر ہے کہ یہ ہائبرڈ ماڈل پی سی بی کے چیئرمین نجم سیٹھی نے بورڈ آف کنٹرول فار کرکٹ ان انڈیا (بی سی سی آئی) کے پاکستان جانے سے انکار کے بعد تجویز کیا تھا۔
ایشیا کپ 2023 چھ ٹیموں کی ٹورنامنٹ ہے جس میں ہندوستان، پاکستان، سری لنکا، بنگلہ دیش، افغانستان اور نیپال شامل ہیں۔ نیپال نے پہلی بار اس ایونٹ میں جگہ بنائی ہے۔
سری لنکا متحدہ عرب امارات میں منعقد ہونے والے 2022 ٹی-ٹوینٹی ایشیا کپ میں پاکستان کو شکست دینے کے بعد دفاعی ایشین چیمپئن ہے۔
اس سال سری لنکا بنگلہ دیش اور افغانستان کے ساتھ گروپ بی میں ہے جبکہ لیگ مرحلے میں ہندوستان کو پاکستان اور نیپال کے ساتھ شامل کیا گیا ہے۔ ہر گروپ سے دو ٹیمیں سپر فور مرحلے میں داخل ہوں گی۔ دوسرے مرحلے کی دو ٹاپ ٹیمیں 17 ستمبر کو فائنل میں آمنے سامنے ہوں گی۔