تین برسوں میں ۲۶ ہزار سرکاری اسامیاں مشتہر

تین برسوں میں ۲۶ ہزار سرکاری اسامیاں مشتہر سرینگر//
جموں کشمیر میں تعلیم یافتہ بے روزگاروں کی تعداد میں مسلسل اضافہ درج کیا جا رہا ہے۔
گذشتہ ۴برسوں کے دوران جموں و کشمیر سروس سلیکشن بورڈ کو۲۶ ہزار اسامیوں کیلئے تقریباً۲۶ لاکھ درخواستیں موصول ہوئی ہیں۔
سرکاری اعداد و شمار کے مطابق ۲۰۱۹سے۲۰۲۳تک۲۶ہزار۶۸۷اسامیوں کو سروس سلیکشن بورڈ کی جانب سے مشتہر کیا گیا ہے، جس کیلئے۲۶لاکھ ۲۲ہزار۲۸۵درخواستیں موصول ہوئیں۔ اس عرصے میں۱۷ ہزار۶۶۸؍ امیدواروں کی تقرری بھی عمل میں لائی گئی۔
۲۰۱۹ میں سروس سلیکشن بورڈ کو ایک لاکھ ۳۰ ہزار ۹۴۰ درخواستیں موصول ہوئیں جن میں۲۶۱۶؍امیدواروں کی تقرری عمل میں لائی گئیں۔ اسی طرح سال ۲۰۲۰میں۳لاکھ۶۶ہزار۶۷۰درخواستیں موصول ہوئیں جن میں۱۴۴۷؍امیدواروں کا تقرر کیا گیا۔
اعداد و شمار کے مطابق ۲۰۲۱میں۶لاکھ ۶۵ہزار۳۶۰ درخواستیں موصول ہوئیں اور اس میں سب سے زیادہ ۹ ہزار ۳۲۹ تقرریاں عمل میں لائی گئیں۔
گذشتہ برس ۲۰۲۲ میں بورڈ کو۴ لاکھ۴۹ہزار۳۱۵ درخواستیں موصول ہوئیں‘۳۵۰۵؍اسامیوں کو مشتہر کیا گیا اور۴۲۷۶؍ امیدواروں کی تعیناتی عمل میں لائی گئی۔
اس دوران ایس ایس بی کو مختلف محکموں کی جانب سے۳۲۳۹ اسامیاں موصول ہوئیں، جن پر ابھی تک کوئی پیش رفت نہیں ہوئی ہے۔ ایسے میں گذشتہ ۴ برسوں کے دوران مجموعی طور پر۱۷ہزار ۶۶۸؍اسامیوں کی تقرریاں عمل میں لائی گئی ہیں۔