لندن// انگلینڈ نے اپنے گھریلوسیزن کا زبردست آغاز کرتے ہوئے ہفتہ کو واحد ٹیسٹ میں آئرلینڈ کو 10 وکٹوں سے شکست دی۔
پہلی اننگز میں 352 رنز سے پیچھے رہنے کے بعد آئرلینڈ نے انگلینڈ کے سامنے صرف 11 رنز کا معمولی ہدف رکھا جسے انگلینڈ نے چار گیندوں میں حاصل کر لیا۔
اینڈی میک برائن (86 ناٹ آؤٹ)، مارک ایڈیئر (88) اور ہیری ٹییکٹر (51) نے شاندار نصف سنچریاں بنا کر آئرلینڈ کو میچ کے تیسرے دن دوسری اننگز کے اسکور 362 تک پہنچا دیا۔ اس کے علاوہ لورکن ٹکر نے بھی 44 رنز بنائے۔
صرف 162 رنز پر چھ وکٹیں گرنے کے بعد میک برائن اور ایڈیئر نے ساتویں وکٹ کے لیے 163 رنز کی شراکت قائم کی۔ جارحانہ انداز اپناتے ہوئے اڈیر نے 76 گیندوں میں 12 چوکوں اور دو چھکوں کی مدد سے 88 رنز بنائے۔ وہ اپنی پہلی بین الاقوامی سنچری کی طرف بڑھ رہے تھے لیکن میتھیو پوٹس نے انہیں جانی بیئرسٹو کے ہاتھوں کیچ کروا کر پویلین لوٹا دیا۔
ایڈیئر کی وکٹ گرنے کے بعد فیون ہینڈ (سات) اور گراہم ہیوم (14) بھی زیادہ دیر تک پچ پر نہ ٹھہر سکے۔ جیمز میک کولم ٹخنے کی انجری کے باعث بیٹنگ کے لیے نہیں آئے اور میک برائن 86 رنز بنا کر آؤٹ ہوئے۔ میک برائن نے اپنی ذمہ دارانہ اننگز میں 115 گیندیں کھیلی، 14 چوکے لگائے اور آئرلینڈ کو 362/9 کے اسکور تک پہنچا دیا۔
ہدف کے تعاقب میں جیک کرولی نے چار گیندوں پر تین چوکے لگا کر انگلینڈ کو فتح دلائی۔ اولی پوپ (205) کو پہلی اننگز میں ڈبل سنچری بنانے پر میچ کا بہترین کھلاڑی قرار دیا گیا۔
انگلینڈ اب 16 جون سے شروع ہونے والی پانچ میچوں کی ایشیز ٹیسٹ سیریز میں آسٹریلیا کا سامنا کرے گی۔