بابر اعظم ورلڈ کلاس کھلاڑی ہیں، میٹ ہنری

کراچی//
نیوزی لینڈ کرکٹ ٹیم کے فاسٹ بولر میٹ ہنری کا کہنا ہے کہ بابر اعظم ورلڈ کلاس کھلاڑی ہیں، انہوں نے آج ایک اور ریکارڈ اپنے نام کیا ہے۔
کراچی میں کھیلے گئے چوتھے ون ڈے انٹرنیشنل کے بعد کیوی فاسٹ بولر میٹ ہنری نے پریس کانفرنس کی۔
میٹ ہنری کا کہنا تھا کہ پاکستان بہت اچھی ٹیم ہے، ورلڈ کپ کی تیاری کے لیے یہ اچھی سیریز تھی۔
انہوں نے کہا کہ ہم سیریز جیت نہ سکے لیکن لڑکوں نے اچھی کرکٹ کھیلی۔
کیوی بولر کا کہنا تھا کہ پاکستان جب اچھی بیٹنگ کررہا تھا تو انہیں روکنے کے لیے وکٹ لینا ضروری تھا، جبکہ پاکستانی بولرز نے درست وقت پر وکٹیں لیں۔
میٹ ہنری نے کہا کہ آغا سلمان کا کیچ مشکل تھا لیکن اس کیچ سے ہمیں اہم وکٹ ملی۔
ان کا مزید کہنا تھا کہ امید ہے ہم اگلے میچ میں کم بیک کریں گے اور سیریز کا اچھا اختتام کریں گے۔
واضح رہے کہ نیوزی لینڈ کے خلاف 5 میچوں کی ہوم سیریز کے چوتھے ون ڈے میں جیت کے ساتھ ہی پاکستان ٹیم دنیائے کرکٹ میں نمبر ون بن گئی ہے۔