’چین کی معاہدوںکی خلاف ورزی نے تعلقات کی بنیاد کو ہلا دیا‘

نئی دہلی//
مشرقی لداخ میں لائن آف ایکچول کنٹرول پر ہندوستان اور چین کی فوجوں کے درمیان گزشتہ تین سالوں سے جاری تعطل کے درمیان وزیر دفاع راج ناتھ سنگھ نے جمعرات کو یہاں چین کے وزیر دفاع جنرل لی شانگفو سے ملاقات کی۔
سنگھ نے کہا کہ دونوں ممالک کے درمیان تعلقات کی ترقی کیلئے سرحد پر امن اور دوستی کی فضا کا ہونا ضروری ہے ۔
چین کے وزیر دفاع شنگھائی تعاون تنظیم کی میٹنگ میں شرکت کے لیے یہاں آئے ہوئے ہیں۔ جمعہ کو تنظیم کی میٹنگ سے قبل دونوں وزرائے دفاع کی ملاقات کے بعد وزارت دفاع نے ایک بیان جاری کیا جس میں کہا گیا کہ دونوں رہنماؤں نے دوطرفہ تعلقات کے مختلف پہلوؤں بشمول ہندوستان،چین سرحدی سرگرمیوں پر کھل کر بات کی۔
سنگھ نے چینی وزیر دفاع سے واضح الفاظ میں کہا کہ ہندوستان اور چین کے درمیان تعلقات کو آگے بڑھانے کے لیے سرحد پر امن اور دوستی کا ماحول ضروری ہے ۔ وزیر دفاع نے اس بات پر زور دیا کہ لائن آف ایکچوئل کنٹرول سے متعلق تمام مسائل کو موجودہ دو طرفہ معاہدوں اور وعدوں کے مطابق حل کیا جانا چاہئے ۔
وزیر دفاع نے کہا کہ موجودہ معاہدوں کی خلاف ورزی سے دو طرفہ تعلقات کی بنیادیں منہدم ہو چکی ہیں۔ انہوں نے کہا کہ صرف سرحد پر فوجیوں کے پیچھے ہٹنے سے کشیدگی میں کمی آئے گی۔
واضح رہے کہ چین کے ساتھ فوجی تعطل شروع ہونے کے بعد چینی وزیر دفاع کا یہ پہلا ہندوستان کا دورہ ہے ۔ ہندوستان پہلے ہی مختلف ملاقاتوں کے دوران کہہ چکا ہے کہ چین کے ساتھ تعلقات اس وقت تک آگے نہیں بڑھ سکتے جب تک سرحد پر امن قائم نہیں ہو جاتا۔
اس دوران وزیر دفاع نے شنگھائی تعاون تنظیم (ایس سی او) کے کل ہونے والے میٹنگ سے قبل جمعرات کو یہاں ایران، قزاخستان اور تاجکستان کے وزرائے دفاع کے ساتھ الگ الگ دو طرفہ میٹنگ کی۔
وزیر دفاع راجناتھ سنگھ نے نئی دہلی میں قزاخستان کے وزیر دفاع کرنل جنرل روسلان زاکسلیہ کوف اور تاجکستان کے وزیر دفاع کرنل جنرل شیرالی مرزو کے ساتھ علیحدہ علیحدہ باہمی میٹنگوں کا اہتمام کیا۔
دونوں وزرائے دفاع سے بات چیت کے دوران قزاخستان اور تاجکستان کے ساتھ ہندوستان کے دفاعی تعاون کا مکمل تفصیلی جائزہ لیا گیا۔ اس دوران باہمی مفادات پر مبنی تعاون کی توسیع کے طور طریقوں شناخت کرنے پر توجہ مرکوز کی گئی۔ میٹنگ میں باہمی مفادات سے متعلق دیگر موضوعات پر بھی تبادلہ خیالات کیے گئے ۔
شنگھائی تعاون تنظیم (ایس سی او) کی۲۸؍ اپریل کو منعقد ہونے والی وزرائے دفاع کی میٹنگ میں حصہ لینے کے لیے تمام وزرائے دفاع، راجناتھ سنگھ کی دعوت پر دہلی آرہے ہیں۔