مودی جمعہ کو پورے ملک میں 91 ایف ایم ریڈیو ٹرانسمیٹر کا افتتاح کریں گے

نئی دہلی//وزیر اعظم نریندر مودی ملک میں آل انڈیا ریڈیو کی ایف ایم سروس کو وسعت دینے کے لیے جمعہ کو 100واٹ کے نئے نصب کیے گئے 91 ایف ایم ٹرانسمیٹروں کا افتتاح کریں گے ۔
جمعرات کو وزیر اعظم کے دفتر سے جاری کردہ ایک ریلیز میں کہا گیا ہے کہ مسٹر مودی صبح 10.30 بجے ویڈیو کانفرنسنگ کے ذریعے ملک کی 18 ریاستوں اور دو مرکز کے زیر انتظام علاقوں کے 84 اضلاع میں ان ایف ایم ٹرانسمیٹروں کا افتتاح کریں گے ۔
بیان میں کہا گیا ہے کہ حکومت ملک میں ایف ایم کنیکٹیویٹی بڑھانے کے لیے پرعزم ہے ۔ اس کا بنیادی مقصد خواہش مند اضلاع اور سرحدی علاقوں میں کوریج کو بڑھانا ہے ۔ نئے ٹرانسمیٹروں سے بہار، جھارکھنڈ، اوڈیشہ، مغربی بنگال، آسام، میگھالیہ، ناگالینڈ، ہریانہ، راجستھان، اتر پردیش، اتراکھنڈ، آندھرا پردیش، کیرالہ، تلنگانہ، چھتیس گڑھ، گجرات، مدھیہ پردیش، مہاراشٹر اور مرکز کے زیر انتظام علاقوں لداخ اور انڈمان۔نکوبار جزائر تک ایف ایم ریڈیو سروس کی توسیع ہوگی ۔
بیان کے مطابق آل انڈیا ریڈیو کی ایف ایم سروس کی اس توسیع سے مزید دو کروڑ لوگ اس سروس سے فائدہ اٹھا سکیں گے اور اس کوریج کو تقریباً 35 ہزار مربع کلومیٹر کے رقبے تک پھیل جائے گی۔
مسٹر مودی نے ریڈیو کو عوام سے جڑنے کا ایک طاقتور ذریعہ بنایا ہے ۔ ان کا ماہانہ ریڈیو خطاب ‘من کی بات’ اپنی تاریخی 100ویں قسط تک پہنچ گیا ہے ۔