شعیب اختر نےبابر کی حمایت کرتے ہوئے ہنڈرڈ لیگ میں منتخب نہ کیے جانے پر حیرانی ظاہر کی

اسلام آباد// دی ہنڈرڈ لیگ میں شامل نہ کیے جانے پر برطانوی فاسٹ باؤلر جیمز اینڈرسن کے بعد شعیب اختر نے بھی پاکستان کرکٹ ٹیم کے کپتان بابر اعظم کی حمایت کی ۔
واضح رہے کہ بابر اعظم پر ایک لاکھ یوروز بولی لگانے کے باوجود انہیں مسلسل دوسرے سال بھی دی ہنڈرڈ لیگ کے ڈرافٹ میں کسی ٹیم نے شامل نہیں کیا تھا۔
گزشتہ سال بھی بابراعظم ہنڈرڈ لیگ ٹورنامنٹ سے باہر رہے تھے، گزشتہ سال ان کی ایک لاکھ 25 ہزار یوروز ریزرو بولی لگائی گئی تھی۔
ڈان کی رپورٹ کے مطابق برطانوی نشریاتی ادارے (بی بی سی) کے ٹیل اینڈرز پوڈکاسٹ پر بات کرتے ہوئے انگلش باؤلر جیمز اینڈرسن نے کہا تھا بابرکو ہنڈرڈ لیگ میں منتخب نہ کیے جانے پر حیران ہوں۔انگلش کرکٹر نے مزید کہا کہ میرے خیال میں بابر کی دستیابی کا مسئلہ تھا جس کی وجہ سے وہ شامل نہیں ہوئے۔
پاکستان کے تیزگیندباز شعیب اختر نے ٹوئٹر پر جیمز اینڈرسن کے بیان پر ٹوئٹ کرتے ہوئے بابر اعظم کی حمایت کی۔
شعیب اختر نے حیرانی کا اظہار کرتے ہوئے لکھا کہ ’میں جیمز اینڈرسن سے اتفاق کرتا ہوں، میں واقعی حیران ہوں کہ دنیا کے ٹی20 کے بہترین کھلاڑی کو دی ہنڈرڈ میں کیوں نہیں شامل کیا گیا۔‘
دی ہنڈریڈ 100 گیندوں پر مشتمل ایک پیشہ ور فرنچائز کرکٹ لیگ ہے جو انگلینڈ اور ویلز میں کھیلی جاتی ہے، اس لیگ کا آغاز 2021 میں ہوا تھا۔
یہ لیگ 8 ٹیموں پر مشتمل ہے اور ہر ایک ٹیم اپنی اننگز میں 100 گیندیں کھیلتی ہے۔دی ہنڈریڈ ٹورنامنٹ رواں سال یکم اگست سے 27 اگست تک جاری رہے گا۔
یاد رہے کہ اس سال کے شروع میں انٹرنیشنل کرکٹ کونسل (آئی سی سی) نےبابر اعظم کو مسلسل دوسری بار ون ڈے پلیئر آف دی ایئر (2022) کے لیے نامزد کیا تھا۔آئی سی سی نے بابر اعظم کی بطور پاکستانی کپتان کردار کی بھی تعریف کی تھی۔