منڈی پونچھ میں آتشزدگی‘پانچ مویشی جھلس کر ہلاک

جموں/سرینگر//
جموںکشمیر کے ضلع پونچھ کے منڈی کے بائیلہ گاؤں میں دوران شب آگ کی ایک واردات میں پانچ مویشی جھلس کر ہلاک ہوگئے ۔
ذرائع نے بتایا کہ منڈی کے بائیلہ گاؤں میں محمد شریف ولد ولی محمد نامی ایک شخص کے رہائشی مکان میں جمعرات اور جمعے کی درمیانی شب آگ نمودار ہوئی جس کے نتیجے میں پانچ مویشی جھلس کر ہلاک ہوگئے ۔انہوں نے کہا کہ ہلاک ہونے والے مویشیوں میں تین بھینس اور دو گائے شامل ہیں۔
ان کا کہنا تھا کہ آگ لگتے ہی فوج، پولیس اور مقامی لوگ جائے واردات پر پہنچے اور آگ کو قابو میں کرلیا۔
ان کا کہنا تھا کہ آگ لگنے کی وجوہات معلوم کی جا رہی ہیں۔
اس دوران سرینگر کے مائسمہ علاقے میں جمعے کی علی الصبح آگ کی ایک واردات میں تین دکان خاکستر ہوگئے ۔
محکمہ فائر اینڈ ایمرجنسی کے ایک عہدیدار نے یو این آئی کو بتایا کہ مائسمہ میں جمعے کی علی الصبح آگ کی ایک واردات میں الیکٹرک ساز و سامان کے تین دکان خاکستر ہوگئے ۔
عہدیدار نے کہا کہ صبح کے قریب ساڑھے چار بجے ہمیں آگ لگنے کے بارے میں فون کال موصول ہوئی جس کے ساتھ ہی ہمارا عملہ ضروری مشینری کے ساتھ جائے واردات پر پہنچا اور آگ کو قابو میں کر لیا۔
آگ لگنے کی وجوہات اور اس سے ہونے والے نقصان کا تخمینہ معلوم کیا جا رہا ہے ۔
دریں اثنا پولیس نے اس ضمن میں ایک کیس درج کرکے کارروائیاں شروع کی ہیں۔