سعودی عرب، رواں سال غیرملکی عازمینِ حج کو زیادہ موقع ملے گا

الریاض//
سعودی وزارتِ حج و عمرہ نے کہا ہے کہ اس سال بیرونِ ممالک کے عازمین کو حج کا زیادہ موقع دیا جائے گا اور کسی بھی ملک سے حجاج کی آمد پر کوئی پابندی نہیں ہوگی۔
العربیہ چینل سے گفتگو کرتے ہوئے معاون سیکرٹری حج انجینیئر ہشام سعید نے کہا کہ اس سال زیادہ عازمین بیرون ممالک سے آئیں گے کیونکہ گزشتہ دو برسوں کے دوران کورونا وبا کے باعث وہ حج سے محروم رہے تھے۔ اس سال انہیں زیادہ موقع دیا جائے گا۔انجینیئر ہشام سعید نے کہا کہ سعودی عرب دنیا کے ہر ملک سے حج کے خواہشمند افراد کو فریضے کی ادائیگی کا موقع دیتا ہے اور اِس مرتبہ کورونا وبا کی پابندیاں نہیں ہوں گی۔معاون سیکرٹری حج نے کہا کہ ہر ملک سے کوٹے کے مطابق عازمین آئیں گے۔ کوٹے کا اصول مسلم وزرائے خارجہ کی عمان کانفرنس میں طے کیا گیا ہے جس کے مطابق ایک ہزار کی آبادی میں سے ایک شخص کو حج کا موقع ملے گا۔
انجینیئر ہشام سعید نے کہا کہ عازمینِ حج کے لیے ضروری ہے کہ وہ ویکسین شدہ ہوں۔ سعودی نظام کے مطابق کورونا ویکسین کی تین خوراکیں لینا لازمی ہے۔ اِس پابندی کا اطلاق سعودی شہریوں، غیرملکیوں اور بیرون ممالک سے آنے والے عازمین سب پر ہوگا۔
ترجمان وزارتِ حج وعمرہ نے الاخباریہ سے گفتگو کرتے ہوئے کہا کہ اس سال حج سیزن کے دوران جدید ٹیکنالوجی پر مبنی بڑے منصوبوں کے تحت کام کیا جائے گا تاکہ حجاج کو کسی قسم کی دشواری کا سامنا نہ کرنا پڑے۔
ترجمان وزارتِ حج کا کہنا تھا کہ حج سیزن کے دوران سب سے بڑا مسئلہ ہجوم کو کنٹرول کرنے کا ہوتا ہے۔ جدید ترین ٹیکنالوجی کی مدد سے حجاجِ کرام کو منظم طور پر مکہ مکرمہ سے مشاعر مقدسہ لے جایا جائے گا اور عازمین مقررہ اوقات کے تحت مناسکِ حج کی ادائیگی کر سکیں گے۔
واضح رہے کہ اس سال مجموعی طور پر 10 لاکھ عازمین حج ادا کریں گے۔