سڈنی// آسٹریلیا کے کپتان پیٹ کمنز کے ہندوستان واپس نہ آنے کی وجہ سے نائب کپتان اسٹیو اسمتھ ہی بارڈر گواسکر ٹرافی کے چوتھے ٹیسٹ میں ٹیم کی قیادت کریں گے کرکٹ آسٹریلیا (سی اے) نے پیر کو اس کی تصدیق کی غورطلب ہے کہ دوسرے ٹیسٹ کے بعد کمنز سڈنی واپس ہوگئے تھے جہاں ان کی والدہ بریسٹ کینسر سے لڑ رہی ہیں۔ کمنز کی غیر موجودگی میں اسمتھ نے آسٹریلیا کو تیسرے ٹیسٹ میں نو وکٹوں سے فتح دلائی۔
سی اے نے بتایا کہ کمنز چوتھے ٹیسٹ کے لیے ہندوستان واپس نہیں آسکیں گے اور آسٹریلیا 9 مارچ سے احمد آباد میں ہونے والے ٹیسٹ میں اسمتھ کی کپتانی میں کھیلے گا۔
ٹیسٹ سیریز کے بعد ہندوستان اور آسٹریلیا کے درمیان 17 مارچ سے شروع ہونے والی تین میچوں کی ون ڈے سیریز میں کمنز کے کھیلنے کے بارے میں کوئی فیصلہ نہیں کیا گیا ہے۔
یہ واضح نہیں ہے کہ کمنز کی غیر موجودگی میں ایک روزہ ٹیم کی قیادت کون کرے گا۔ گزشتہ سال انگلینڈ کے خلاف ایک روزہ سیریز کے ایک میچ میں جوش ہیزل ووڈ نے کپتان کا کردار ادا کیا تھا، حالانکہ وہ خود انجری کے باعث دورہ ہندوستان سے باہر ہو چکے ہیں۔ اس سے قبل اسمتھ اور ایلکس کیری بھی آسٹریلیا کی کپتانی کر چکے ہیں۔
ہندوستان اس وقت چار میچوں کی ٹیسٹ سیریز میں 2-1 سے آگے ہے۔ ہندوستان احمد آباد ٹیسٹ جیت کر ورلڈ ٹیسٹ چیمپئن شپ (ڈبلیو ٹی سی) فائنل میں پہنچ سکتا ہے، جبکہ آسٹریلیا کے پاس سیریز 2-2 سے برابر کرنے کا موقع ہے۔
آسٹریلیا کے تیز گیند باز جھئے رچرڈسن ہیمسٹرنگ انجری کی وجہ سے ہندوستان کے خلاف 17 مارچ سے شروع ہونے والی تین میچوں کی ون ڈے سیریز سے باہر ہو گئے ہیں۔
پیر کو اس کا اعلان کرتے ہوئے کرکٹ آسٹریلیا (سی اے) نے کہا کہ نیتھن ایلس ان کی جگہ آسٹریلیائی اسکواڈ میں شامل ہوں گے۔ ای ایس پی این کرک انفو کے مطابق رچرڈسن کا انڈین پریمیئر لیگ (آئی پی ایل) کے آئندہ سیزن میں ممبئی انڈینز کے لیے کھیلنا بھی مشکل ہے۔
خیال ر ہے کہ رچرڈسن جنوری کے پہلے ہفتے بگ بیش لیگ (بی بی ایل) میں پرتھ اسکارچرز کی جانب سے کھیلتے ہوئے زخمی ہو گئے تھے۔ انہوں نے ہفتہ کو یہاں اپنے کلب فریمینٹل کے لیے ایک ون ڈے کھیلتے ہوئے کرکٹ میں واپسی کی، حالانکہ وہ میچ میں صرف چار اوور کر سکے اور میدان سے باہر چلے گئے۔
رچرڈسن کی جگہ ٹیم میں شامل ایلس نے اپنے کیریئر میں اب تک صرف تین ون ڈے کھیلے ہیں۔ ڈومیسٹک ون ڈے کرکٹ میں انہوں نے 20 میچ کھیلے ہیں اور 26.20 کی اوسط سے 30 وکٹیں حاصل کی ہیں۔
ہندستان اور آسٹریلیا کے درمیان پہلا ون ڈے 17 مارچ کو ممبئی کے وانکھیڑے اسٹیڈیم میں کھیلا جائے گا۔ اس کے علاوہ دوسرا (19 مارچ) اور تیسرا (22 مارچ) ون ڈے بالترتیب وشاکھاپٹنم اور بنگلور میں ہوگا۔