ہندوستان کے دورے پر پچیں خراب ہی رہی ہیں: ٹیلر

اندور// آسٹریلیا کے سابق کپتان مارک ٹیلر کا خیال ہے کہ ہندوستان اور آسٹریلیا کے درمیان جاری بارڈر-گاوسکر ٹرافی 2023 کے اب تک کے مقابلے خراب پچوں پر کھیلے گئے ہیں۔قابل ذکر ہے کہ ہندوستان اور آسٹریلیا کے درمیان کھیلے گئے تیسرے ٹیسٹ کے لیے استعمال ہونے والی اندور کی پچ کو انٹرنیشنل کرکٹ کونسل (آئی سی سی) نے ‘خراب’ قرار دیا تھا۔ اس سے قبل، ناگپور اور دہلی میں کھیلے گئے ٹیسٹ میچوں میں استعمال ہونے والی پچوں کو بھی آئی سی سی نے ‘اوسط’ زمرے میں رکھا تھا۔
سڈنی مارننگ ہیرالڈ نے ٹیلر کے حوالے سے کہا، "میں (اندور کی پچ پر) آئی سی سی کے فیصلے سے اتفاق کرتا ہوں۔ میرے خیال میں اس سیریز میں پچ خراب رہی ہیں، اور اندور کی پچ تینوں میں سے سب سے خراب تھی۔ مجھے نہیں لگتا کہ پہلے دن کسی پچ گینداتنی ٹرن ہونی چاہیے۔”
ناگپور اور دہلی ٹیسٹ کی طرح اندور ٹیسٹ بھی تین دن میں ختم ہو گیا، حالانکہ اس بار مہمان ٹیم جیت گئی۔ ہولکر اسٹیڈیم کی پچ پر پہلے ہی سیشن سے گیند ضرورت سے زیادہ ٹرن ہوئی ، جس کا فائدہ اٹھاتے ہوئے آسٹریلیا نے ہندوستان کو پہلی اننگز میں 109 رنز پر ڈھیر کردیا۔ اس کے بعد آسٹریلیا نے پہلی اننگز میں 88 رنز کی برتری حاصل کی جو ہندوستان کی شکست کی بڑی وجہ بنی۔
ٹیلر نے کہا، "اگر میچ چوتھے یا پانچویں دن تک چلتا ہے، تو آپ سمجھ سکتے ہیں، لیکن پہلے دن سے گیند کو ٹرن نہیں ہونا چاہیے، یہ صرف خراب تیاری کا نتیجہ ہے۔ میرے خیال میں اندور کی پچ بہت خراب تھی۔ اور اسے اسی طرح کی درجہ بندی ملنی چاہئے۔”
تاہم ہندوستانی لیجنڈ سنیل گواسکر نے اندور کی پچ پر آئی سی سی کے تبصرے سے اتفاق نہیں کیا۔ گواسکر نے یاد دلایا کہ دسمبر 2022 میں آسٹریلیا اور جنوبی افریقہ کے درمیان گابا ٹیسٹ صرف دو دن میں ختم ہو گیا تھا، اس کے باوجود پچ کو آئی سی سی نے صرف اوسط سے کم کے زمرے میں رکھا تھا۔
ٹیلر نے گابا پچ کے بارے میں کہاکہ گابا میں کیوریٹر نے پچ پر تھوڑی زیادہ گھاس چھوڑی تھی، لیکن اس سے کسی بھی ٹیم کو زیادہ مدد نہیں ملی۔ انہوں نے کہا، "مجھے نہیں لگتا کہ گابا میں ایسی کوئی چال چلی گئی تھی۔ اندور کی پچ اتنی خراب بنائی گئی تھی کہ اس میچ سے ہندوستان کو کوئی فائدہ نہیں ہوا۔ درحقیقت، اس سے آسٹریلیائی اسپنرز کو زیادہ مدد ملی ۔”
ہندوستان اس وقت چار میچوں کی ٹیسٹ سیریز میں 2-1 سے آگے ہے۔ سیریز کا آخری میچ 9 مارچ سے احمد آباد کے نریندر مودی اسٹیڈیم میں کھیلا جائے گا۔ اگر ہندوستان یہ میچ جیت جاتا ہے تو وہ جون میں آسٹریلیا کے خلاف ورلڈ ٹیسٹ چیمپئن شپ کے فائنل میں جگہ بنا لے گا۔