منیش سیسودیا کو پانچ دنوں کی سی بی آئی تحویل میں بھیجا گیا، 4 مارچ کو عدالت میں پیش کرنے کا حکم

نئی دہلی//دہلی میں 2021-2022 کی ایکسائز پالیسی میں مبینہ بے ضابطگیوں کے الزامات میں گرفتار دہلی کے نائب وزیر اعلی منیش سیسودیا کو مرکزی تفتیشی بیورو کی خصوصی عدالت نے پیر کے روز پانچ دنوں کے لیے سی بی آئی کی حراست میں بھیج دیا۔
سی بی آئی کے خصوصی جج ایم کے ناگپال کی عدالت نے متعلقہ فریقوں کے دلائل سننے کے بعد مسٹر سیسودیا کو سی بی آئی کی تحویل میں بھیجنے کا حکم دیا۔
عام آدمی پارٹی کے لیڈر مسٹر سیسوڈیا کی ریمانڈ کے لیے سی بی آئی کی درخواست کو قبول کرتے ہوئے عدالت نے 4 مارچ کو دوپہر 2 بجے ملزم کو عدالت میں پیش کرنے کا حکم دیا۔
سی بی آئی کی طرف سے پیش ہونے والے خصوصی سرکاری وکیل پنکج گپتا نے مختلف دلائل دیتے ہوئے پوچھ گچھ کی ضرورت بتائی اور عدالت سے مسٹر سیسودیا کی پانچ دنوں کی تحویل کی درخواست کی۔
مسٹر سیسودیا کی طرف سے سینئر وکیل ڈی کرشنن، موہت ماتھر اور سدھارتھ اگروال پیش ہوئے ، سی بی آئی کی حراست کو غیر ضروری اور قانون کا غلط استعمال قرار دیتے ہوئے نائب وزیر اعلیٰ کے ریمانڈ کے مطالبہ کی سختی سے مخالفت کی۔
مسٹر سیسودیا کو دہلی کی ایکسائز پالیسی 2021-2022 میں مبینہ بے ضابطگیوں کے سلسلے میں آٹھ گھنٹے پوچھ گچھ کے بعد اتوار کے روز سی بی آئی نے گرفتار کیا تھا۔اس پالیسی کو دہلی حکومت نے تنازعہ کے بعد ختم کر دیا تھا۔ سی بی آئی کا الزام ہے کہ مسٹر سیسودیا تحقیقات میں تعاون نہیں کر رہے تھے ۔
جانچ ایجنسی سی بی آئی نے 17 اکتوبر 2022 کو مسٹر سسودیا سے پوچھ گچھ کی تھی۔ اس سے پہلے سی بی آئی نے 17 اگست کو مسٹر سیسودیا سمیت 14 لوگوں کے خلاف ایف آئی آر درج کی تھی۔