سچ …کس کا سچ؟

یہ سچ ہے کہ سچ‘ سچ ہے ‘ لیکن بھئی سچ تو یہ بھی ہے کہ کس کا سچ ‘ سچ ہے ؟اُس کا سچ‘اِس کا سچ‘ آپ کا سچ‘ میرا سچ یا کسی اورکا سچ کہ سچ تو سچ ہے لیکن کس کا سچ ‘ سچ ہے‘ کوئی نہیں جانتا …آپ اور نہ ہم۔یقین کریں کہ نہیں خبر تھی کہ کبھی کبھی سچ تک پہنچنا مشکل کیا ناممکن ہو جائیگا ۔سچ کیا ہے کوئی کچھ نہیں جانتا ہے وہ لوگ بھی نہیں جن کا دعویٰ ہے کہ وہ سچ جانتے ہیں ۔کوئی ابھی تک سامنے آکر یہ نہیں کہہ پایا ہے کہ وہ سچ جانتا ہے ‘جو کچھ بھی وہ کہہ رہاہے صرف سچ کہہ رہا ہے ‘ سچ کے سوا کچھ نہیں ۔ہر ایک یقین کر بیٹھا ہے کہ وہ سچ جانتا ہے اور جو وہ جانتا ہے وہ اسی بات کو سچ مان رہا ہے اس کے بغیر کسی اور بات کو وہ سچ ماننے سے انکار کررہا ہے‘ اسے جھوٹ قرار دے رہا ہے ۔یعنی وہ اپنے سچ کو سچ اور دوسرے کے سچ کو سچ نہیں بلکہ جھوٹ مان رہا ہے …پرکس بنیاد پر اسے خود معلوم نہیں ۔ہم بھی یہ دعویٰ نہیں کر سکتے ہیں کہ ہم سچ جانتے ہیں ‘اس لئے ہم یہاں بیٹھ کر کسی کے سچے تو کسی کے جھوٹے ہونے کا فتویٰ نہیں دے سکتے ہیں کہ ہم اس پوزیشن میں نہیں …کوئی اور ہو سکتا ہے ہم نہیں ۔اس لئے ہم اس پر بات بھی نہیں کریں گے کہ کون سچ کہہ رہا ہے ‘ کون جھوٹا ہے اور کون سچ کو چھپانے کیلئے کوشاں ہے…ہم اس بارے کوئی بھی بات نہیں کریں گے ۔ہم اگر کچھ جانتے ہیں تو صرف یہ کہ جو کوئی بھی کچھ کہہ رہا ہے وہ صرف دعویٰ ہے اور وہ اپنے اس دعوے کو سچ ثابت نہیں کر پا رہا ہے ۔اس کے پاس ایسا کچھ بھی نہیں ہے جو اس کے اِس دعوے کو حقیقت کے روپ میں سامنے لائے ۔پر کوئی تو ہو گا جو سچ جانتا ہو گا ‘ جس کا سچ اسی کا سچ نہیں وہ سچ میں سچ ہی ہو اور کچھ نہیں ۔جو اس لئے سچ نہیں ہو گا کہ وہ اسے سچ سمجھتا ہے بلکہ اس لئے کہ جو وہ کہہ رہا ہے وہی سچ ہوگا… اصل سچ‘ اصل حقیقت …پر یہ سچ ہے کہاں‘کس کا سچ‘سچ ہے ۔ہے نا؟