وادی کابیرونی دنیا سے رابطہ بحال

سرینگر//
کشمیر کا بیرونی دنیا کے ساتھ زمینی و فضائی رابطہ ہفتے کو ایک روز بعد بحال ہوگیا۔
جہاں ہفتے کو سرینگر بین الاقوامی ہوائی اڈے پر پروازوں کا سلسلہ بحال ہوگیا وہیں سرینگر ‘جموں قومی شاہراہ پر بھی ٹریفک کی نقل و حمل بحال کر دی گئی۔
ائیر پورٹ حکام کے مطابق سری نگر ہوائی اڈے کی رن وے سے برف ہٹایا گیا ہے ۔انہوں نے کہا کہ ہوائی اڈے پر پہلی پرواز دلی سے دوپہر تک آئی گی۔
ان کا کہنا تھا کہ جمعہ کو پروازیں معطل رہنے کے باعث ہفتے کو زیادہ تعداد میں پروازیں آنے کا امکان ہے ۔
دریں اثنا وادی کشمیر کو ملک کے باقی حصوں کے ساتھ جوڑنے والی سرینگر، جموں شاہراہ پر ٹریفک کو ہفتے کو ایک روز بعد بحال کر دیا گیا۔
ٹریفک حکام نے بتایا کہ قومی شاہراہ پر چھوٹی گاڑیوں کی دو طرفہ آوا جاہی کی اجازت ہے ۔انہوں نے کہا کہ قومی شاہراہ پر رام بن کے مہر اور دیگر علاقوں میں چٹانیں اور مٹی کے تودے گر آئے تھے جس کے بعد اس پر ٹریفک بند کر دیا گیا تھا۔
ان کا کہنا تھا کہ شاہراہ کو قابل آمد و رفت بنانے کیلئے افرادی قوت اور مشینری کو کام پر لگا دیا گیا تھا۔
کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ ٹریفک کی نقل و حمل کیلئے پہلے ہی بند ہے جبکہ سرینگر، لیہہ شاہراہ پر بھی ٹریفک کو معطل کر دیا گیا ہے ۔