سرینگر/۵جنوری
شمالی کشمیر کے ترکول بل پٹن میں 21سالہ دوشیزہ نے مبینہ طورخود کشی کرکے اپنا کام تمام کیا۔
ذرائع نے بتایا کہ پٹن کے ترکول بل علاقے میں جمعرات کے روز 21سالہ دوشیزہ نے اپنے ہی مکان کے اندر اپنے آپ کو لٹکا کر اپنی زندگی تمام کی۔
گھر والوں نے جب دوشیزہ کو اپنے کمرے میں لٹکتے دیکھا تو انہوں نے فوری طور پر اس کو سب ضلع ہسپتال منتقل کیا لیکن وہاں ڈاکٹروں نے دوشیزہ کو مردہ قرار دیا۔
دریں اثنا ایک پولیس افسر نے واقعے کی تصدیق کرتے ہوئے کہا اس سلسلے میں ایک کیس درج کرکے تحقیقات شروع کی گئی ہیں۔
واضح رہے کہ پچھلے پانچ دنوں کے دوران دو دوشیزاو¿ں سمیت پانچ افراد نے اپنی زندگیو ں کا خاتمہ کیا جبکہ شمالی کشمیر میں چوبیس گھنٹوں کے دوران یہ اپنی نوعیت کا دوسرا واقع ہے ۔
سال گزشتہ کے آخری دن شمالی کشمیر کے بارہ مولہ کی ایک دوشیزہ نے دریائے جہلم میں چھلانگ مار کر اپنی زندگی کا کام تمام کر دیا ابھی اسکی نعش دریا سے نکالنے کاعمل جاری ہے تاہم سال نو کے پہلے ہی روز اسی طرح کی خودکشی کا اور ایک افسوس ناک ترال میں پیش آیا جہاں بارہویں جماعت میں زیر تعلیم طالب علم نے پھانسی پر لٹکا کر اپنی زندگی کا چراغ گل کیا۔
سری نگر میں گزشتہ روز ہی دریائے جہلم سے ایک شخص کی لاش برآمد کی گئی اور بتایا جارہا ہے کہ اُس نے بھی خود کشی کی ہے ۔
تین ہفتے قبل بارہ مولہ میں دوشیزہ نے دریائے جہلم میں چھلانگ لگائی اور اُس کی لاش ابھی تک برآمد نہیں ہو سکی جبکہ سوپور میں خود کشی کرنے والی دوشیزہ کی لاش کو باز یاب کرنے کی خاطر تلاشی آپریشن جاری ہے ۔
