سڈنی//) اسپین کے ٹینس لیجنڈ اور 22 بار کے گرینڈ سلیم فاتح رافیل نڈال نے اپنی ریٹائرمنٹ کی قیاس آرائیوں کو ختم کرتے ہوئے ہفتہ کو کہا کہ وہ اب بھی اعلیٰ سطح پر کھیل سے لطف اندوز ہو رہے ہیں۔
یونائیٹڈ کپ مکسڈ ٹیم ٹورنامنٹ میں کیمرون نوری سے ہارنے کے بعد 36 سالہ نڈال نے کہا کہ ’’میں صرف اپنا میچ ہارا ہوں۔ صرف یہی بات ہے نا؟ میں جب بھی پریس کانفرنس میں آتا ہوں، مجھے لگتا ہے کہ مجھے ریٹائر ہو جانا چاہیے۔ آپ میرے ریٹائرمنٹ میں کافی دلچسپی لے رہے ہیں۔ فی الحال تو اس کا کوئی امکان نہیں ہے‘‘۔
واضح رہے کہ نڈال کو نوری کے ہاتھوں 6-3، 3-6، 4-6 سے شکست کا سامنا کرنا پڑا۔ شکست کے بعد جب نڈال سے ریٹائرمنٹ سے متعلق سوالات پوچھے گئے تو انہوں نے مسکراتے ہوئے کہا کہ ایسی کوئی بات ان کے ذہن میں نہیں ہے۔
نڈال نے کہا ’’جب وہ دن آئے گا، میں آپ کو سب بتاؤں گا۔ ریٹائرمنٹ کے بارے میں بات نہ کریں، کیونکہ میں یہاں ٹینس کھیلنا جاری رکھنے والا ہوں‘‘۔
انہوں نے کہا ’’میں چیزوں کو بہتر طریقے سے کر سکتا ہوں اور مجھے یہ کرنے کی ضرورت ہے۔ انہوں (نوری) نے اپنا پہلا میچ دو دن پہلے کھیلا تھا اور اس سے انہیں فائدہ ہوا۔ مجھے تھوڑا زیادہ چست ہونے کی ضرورت ہے، مجھے تھوڑا مضبوط ہونے کی ضرورت ہے۔ کچھ مواقع پر کم غلطیوں اور بہتر فیصلوں کے ساتھ طویل عرصے تک کھیلنے کی ضرورت ہے۔
واضح رہے کہ آسٹریلین اوپن 2022 کے فاتح نڈال گرینڈ سلیم ایونٹ کے 2023 ایڈیشن کی تیاری کے حصے کے طور پر یونائیٹڈ کپ میں حصہ لے رہے ہیں۔ آسٹریلین اوپن 16 جنوری (پیر) سے میلبورن پارک میں شروع ہونے جا رہا ہے۔