مودی نے دودھ کی قیمت بڑھا کر عوام کو سال نو کا تحفہ دیا: کانگریس

نئی دہلی//کانگریس نے دودھ کی قیمتوں میں اضافہ کے سلسلے میں حکومت پر طنز کرتے ہوئے کہا کہ وزیر اعظم نریندر مودی کی قیادت والی حکومت نے دودھ کی قیمت میں 2 روپے فی لیٹر اضافہ کرکے ملک کے عوام کو نئے سال کا تحفہ دیا ہے ۔
کانگریس کے ترجمان گورو ولبھ نے منگل کو یہاں ایک پریس کانفرنس میں کہا کہ اس حکومت نے ایک سال میں دودھ کی قیمت میں پانچ بار اضافہ کیا ہے اور اب نیا سال شروع ہونے سے پہلے اس نے دودھ کی قیمت میں اضافہ کرکے عوام کے پیٹ پر حملہ کیا ہے ۔
انہوں نے کہا کہ حکومت نے ایک سال میں پانچ بار دودھ کی قیمت میں اضافہ کرکے نیا ریکارڈ بنایا ہے ۔ آج تک کسی حکومت نے ایسا ریکارڈ نہیں بنایا۔
کانگریس لیڈر نے طنز کرتے ہوئے کہا کہ ‘‘مودی نے نئے سال پر دودھ کی قیمت میں دو روپے فی لیٹر اضافہ کرکے ملک کے عوام کو نئے سال کا تحفہ دیا ہے ۔ یہ وزیراعظم کا اس سال کا آخری تحفہ ہے ۔
انہوں نے کہا کہ مہنگائی کم نہیں ہو رہی۔ مہنگائی مسلسل 6 فیصد سے اوپر رہی۔ اس بار بھی صورتحال اچھی نہیں ہے اور ریزرو بینک نے مہنگائی کی شرح 6.7 فیصد رہنے کا اندازہ لگایا ہے ۔