پوچیفسٹروم// سلیمہ ٹیٹے کی قیادت میں ہندوستانی جونیئر خواتین ہاکی ٹیم یکم اپریل سے شروع ہونے والے 2022 خواتین کے ایف آئی ایچ جونیئر ہاکی ورلڈ کپ کے لیے پوری طرح تیار ہے۔
یوتھ اولمپک گیمز 2018 میں انڈر۔18 ٹیم کے لیے تاریخی چاندی کا تمغہ جیتنے والی کپتان سلیمہ ٹیٹے نے بدھ کو ایک بیان میں کہاکہ ’’کھلاڑیوں میں بہت جوش و خروش ہے۔ ہر ایک نے اس لمحے کے لیے بہت محنت کی ہے اور ٹورنامنٹ کی تاریخ کو بہتر کرنے کے لیے استعمال کیا ہے۔ ہم نے ایک ٹیم کے طور پر بہتری لانے کی کوشش کی ہے تاکہ ہم یہاں اپنی بہترین کارکردگی کا مظاہرہ کر سکیں۔ ‘‘
ویمنز ہاکی جونیئر ورلڈ کپ کے لیے ٹیم کی تیاریوں کے بارے میں بات کرتے ہوئے سلیمہ نے کہاکہ ’’جلد جنوبی افریقہ آنے سے ہمیں بہت مدد ملی ہے۔ ہم یہاں کافی تعداد میں تربیتی سیشن کرنے میں کامیاب رہے ہیں، جس نے ہمیں موسم کے مطابق ڈھالنے میں مدد کی ہے۔ دن کے وقت یہاں بہت زیادہ گرمی اور نمی رہتی ہے۔ ہمیں یقینی طور پر بھونیشور میں اپنے آخری کیمپ میں تھوڑی مدد ملی جہاں ہم نے جنوبی افریقہ آنے سے پہلے انتہائی گرم حالات میں تربیت حاصل کی تھی۔
جونیئر خواتین ہاکی ٹیم کی کپتان نے کہاکہ “ٹیم اپنی بہترین کارکردگی دکھانے کے لیے پراعتماد ہے۔ ہم اچھی طرح سے تیار ہیں اور ہمارے پاس تجربہ کار کھلاڑیوں کا اچھا امتزاج ہے۔ ہمارا مقصد ایک وقت میں ایک میچ پر توجہ مرکوز کرنا، اچھی شروعات کرنا اور پلان کے مطابق کھیلنا ہوگا۔‘‘
پول ڈی میں ہندوستانی ٹیم 2 اپریل کو ویلز کے خلاف میچ سے ٹورنامنٹ میں اپنی مہم کا آغاز کرے گی۔ اس کے بعد ہندوستان دوسرا میچ جرمنی کے خلاف کھیلے گا۔ گروپ مرحلے کے آخری میچ میں ان کا مقابلہ ملائیشیا سے ہوگا۔ ٹورنامنٹ کے کوارٹر فائنل میچز 7 اور 8 اپریل کو کھیلے جائیں گے جبکہ سیمی فائنل اور فائنل بالترتیب 10 اور 12 اپریل کو ہوں گے۔
واضح رہے کہ خواتین کا ایف آئی ایچ جونیئر ہاکی ورلڈ کپ جنوبی افریقہ میں کورونا کے نئے ویریئنٹ اومیکرون کے خطرے کی وجہ سے دسمبر 2021 تک ملتوی کر دیا گیا تھا۔