محبوبہ مفتی لاشوں پر سیاست کرنا بند کریں:رینا

جموں//
پیپلز ڈیموکریٹک پارٹی(پی ڈی پی )کی صدر‘ محبوبہ مفتی کو تاریخ کا مشاہدہ کرنے کا مشورہ دیتے ہوئے بھارتیہ جنتا پارٹی(بی جے پی)کے جموںکشمیر یونٹ کے صدر نے کہاکہ محبوبہ مفتی کو لاشوں پر سیاست کرنا بند کرنی چاہئے ۔انہوں نے کہاکہ عوامی نمائندوں کو یہ زیب نہیں دیتا کہ وہ اس طرح کے بیانات دیں ۔
ان باتوں کا اظہار رینا نے پریس کلب جموں کے باہر نامہ نگاروں سے بات چیت کے دوران کیا۔انہوں نے کہاکہ بھارت ایک جمہوری ملک ہے لہذا جموں کشمیر کے عوامی نمائندوں کو آئین پر پوری طرح سے بھروسہ کرنا چاہئے ۔
محبوبہ کی جانب سے بی جے پی کے خلاف سخت بیانات دینے کے بارے میں پوچھے گئے سوال کے جواب میں رینا نے کہاکہ محبوبہ کو لاشوں پر سیاست کرنا بند کرنی چاہئے کیونکہ جو عوامی نمائندے ہوتے ہیں اُنہیں عوام کی فلاح و بہبود کیلئے کام کرنا چاہئے ۔انہوں نے کہاکہ محبوبہ مفتی ملک کے خلاف بیانات دے رہی ہیں اور اس کو برداشت نہیں کیا جائے گا۔
رینا نے مزید کہاکہ محبوبہ مفتی نے قبائیلوں کے حوالے سے جو بیان دیا وہ گمراہ کن ہے کیونکہ سال۱۹۴۷میں پاکستانی آرمی نے جموں وکشمیر پر حملہ کیا اور فوج کے ساتھ ساتھ جموں وکشمیر کے لوگوں نے اُن کا مقابلہ کیا۔انہوں نے بتایا کہ شیر وانی کو کون بھول سکتا ہے کہ انہوں نے قبائیلوں کے خلاف جنگ لڑی ۔
محبوبہ اور دوسرے لیڈران کو سرکاری کوٹھیاں خالی کرنے کے بارے میں پوچھے گئے سوال کے جواب میں رینا نے کہاکہ جب بھاجپا کے لیڈروں کو متعلقہ محکمہ کی جانب سے نوٹس موصول ہوگی تو ہم بھی اپنے کواٹر خالی کریں گے ۔انہوں نے کہاکہ ملک کے خلاف سخت بیانات دینے والوں کے ساتھ اب سختی کے ساتھ نپٹا جائے گا۔
فاروق عبداللہ کی جانب سے مستعفی ہونے کے بارے میں بی جے پی صدر نے کہاکہ فاروق صاحب ایک قدر آور لیڈر ہیں ۔انہوں نے کہاکہ فاروق عبداللہ کافی بزرگ ہیں اور ہر چیز کا ایک وقت ہوتا ہے ۔