لاہور ///
انگلش کرکٹ بورڈ کے منیجنگ ڈائریکٹر”راب کی "کا کہنا ہے کہ انگلینڈ کی ٹیم کا دورہ پاکستان شیڈول کے مطابق ہوگا، کسی قسم کی تشویش نہیں ہے، سکیورٹی پر بھروسہ ہے ۔
نجی ٹی وی "جیو نیوز” کے مطابق انگلش کرکٹ ٹیم کے 43 سالہ ایم ڈی "راب کی "نے کہا کہ سکیورٹی وفد نے حالات معمول کے مطابق ہونے کی رپورٹ دی اور ای سی بی سمیت ٹیسٹ سکواڈ کے ہر کھلاڑی کو اپنے سکیورٹی وفد کی رپورٹ پر مکمل بھروسہ ہے۔
ٹیم کا دورہ پاکستان تاریخی ہوگا، گزشتہ مہینے ٹی ٹونٹی سیریز کے دوران پاکستان میں انگلینڈ کا بہترین خیال رکھا گیا تھا، پاکستان میں جتنی سکیورٹی ملی، ہم نے اس سے بہتر کی اُمید نہیں کی تھی لہٰذا ای سی بی اور سکیورٹی وفد پر بھروسہ ہے، ہمیں کوئی تشویش نہیں ہے۔
یاد رہے کہ پاکستان کرکٹ بورڈ (پی سی بی) کے چیف سلیکٹر محمد وسیم نے انگلینڈ کے خلاف آئندہ تین میچوں کی ٹیسٹ سیریز کے لیے سکواڈ کا اعلان کر دیا۔
سٹار فاسٹ بولر شاہین آفریدی گھٹنے کی انجری کے باعث 18 رکنی سکواڈ سے باہر ہو گئے ہیں ،انہیں یہ انجری 13 نومبر کو انگلینڈ کے خلاف ٹی ٹونٹی ورلڈ کپ 2022ء کے فائنل کے دوران ہوئی تھی ۔ تیز گیند باز نے اتوار کو اپینڈیکٹومی بھی کروائی، جو کہ اپینڈکس میں انفیکشن ہونے پر اسے ہٹانے کی ایک سرجری ہے۔ کھیل کے تمام فارمیٹس میں پاکستان کے سٹرائیک باؤلر کے پاس 2018ء سے شروع ہونے والے کیریئر سے ٹیسٹ کرکٹ میں 99 ، 62 ون ڈے اور 58 ٹی ٹونٹی بین الاقوامی وکٹیں ہیں۔
پاکستانی سکواڈ میں بابر اعظم، محمد رضوان، عبداللہ شفیق، ابرار احمد، اظہر علی، فہیم اشرف، حارث رؤف، امام الحق، محمد نواز، وسیم جونیئر، نسیم شاہ، نعمان علی، سلمان علی آغا، سرفراز احمد، سعود شکیل، شان مسعود اور زاہد محمود ہیں۔