دہلی فسادات 2020: سابق کونسلر طاہر کی درخواست خارج

نئی دہلی//سپریم کورٹ نے 2020 کے دہلی فسادات کے ملزم عام آدمی پارٹی کے سابق میونسپل کونسلر طاہر حسین کی اپیل پیر کو مسترد کر دی۔
طاہر نے دہلی ہائی کورٹ کے اپنے خلاف درج مقدمات پر روک لگانے سے انکار کے بعد سپریم کورٹ سے رجوع کیا تھا۔
جسٹس اجے رستوگی اور جسٹس سی ٹی روی کمار پر مشتمل بنچ نے دہلی ہائی کورٹ کے فیصلے میں مداخلت کرنے سے انکار کر دیا، جہاں 16 اکتوبر کو طاہر کی عرضی خارج کر دی گئی تھی۔
سپریم کورٹ نے عرضی کو خارج کرتے ہوئے اس حقیقت کا نوٹس لیا کہ ہائی کورٹ نے اس معاملے کی سماعت کی اگلی تاریخ 25 جنوری مقرر کی ہے ۔
طاہر کے خلاف شمال مشرقی دہلی کے کھجوری خاص پولیس اسٹیشن میں 2020 میں ایف آئی آر درج کی گئی تھی۔ ان پر فسادات بھڑکانے اور غیر قانونی اسلحہ رکھنے سمیت کئی دیگر سنگین الزامات ہیں۔ اس معاملے میں وہ 16 مارچ 2020 سے عدالتی حراست میں جیل میں ہیں۔