لکھنو//
جموں کشمیر کے سابق وزیر اعلی اور نیشنل کانفرنس کے صدر‘ فاروق عبداللہ نے ہفتہ کو سماجو ادی پارٹی(ایس پی) صدر اکھلیش یادو سے ملاقات کی اور ان کے والد‘ ملائم سنگھ کے انتقال پر اپنی تعزیت کا اظہار کیا۔
اکھلیش یادو سے ان کی رہائش گاہ پر ملاقات کے بعدفاروق عبداللہ نے کہا’’میں ملائم سنگھ یادو کے بہت قریب تھا اور ان سے ایک عرصے سے جان پہچان تھی۔ جب وہ ملک کے وزیر اعظم بننے والے تھے اس وقت میں نے کافی کوششیں کی تھیں۔لیکن ایسا ممکن نہیں ہوسکا‘‘۔
فاروق عبداللہ نے کہا کہ پارلیمنٹ میں ان کی اور ملائم سنگھ کی سیٹیں ایک ساتھ تھیں۔ان کے انتقال پرملال پر میں نہیں آسکا تھا۔آج میں نے اکھلیش یادو سے ملاقات کی اور تعزیت کا اظہار کرتے ہوئے مرحوم کی روح کی تسکین کیلئے دعا گو ہوں‘‘۔
سیاسی سوال کہ آیا مستقبل میں اکھلیش یادو تیسرے محاذ کی قیادت کرسکتے ہیں پر انہوں نے کہا’’اس پر میں آپ کے سامنے کچھ نہیں کہ سکتا۔ جب آل پارٹی میٹنگ منعقد ہوگی تو ہم اس پر تبادلہ خیال کریں گے ۔‘‘