سرینگر//
سی بی آئی نے ہفتہ کو پولیس سب انسپکٹر (پی ایس آئی) بھرتی گھوٹالہ میں ملوث ۲۴ ملزمین کے خلاف چارج شیٹ داخل کی۔
سی بی آئی کے ترجمان کے ایک بیان کے مطابق ایجنسی نے آج جے اینڈ کے پی ایس آئی بھرتی گھوٹالہ سے متعلق کیس میں ۲۴ ملزمان کے خلاف چارج شیٹ داخل کی ہے جن میں بی ایس ایف کے اُس وقت کے کمانڈنٹ، اُس وقت کے اے ایس آئی، جموں و کشمیر پولیس کے کانسٹیبل، سی آر پی ایف کے اُس وقت کے اہلکار، ایک استاد اور دیگر افراد شامل ہیں ۔
بیان میں کہا گیا ہے کہ جے اینڈ کے سروسز سلیکشن بورڈ کے ذریعہ منعقدہ تحریری امتحان میں بے ضابطگیوں کے الزامات کی تحقیقات کے لئے جموں و کشمیر حکومت کی درخواست پر۳؍اگست۲۰۲۲ کو ایک مقدمہ درج کیا گیا تھا۔
اس میں مزید کہا گیا ہے کہ تفتیش کئی ریاستوں میں پھیلی ہوئی تھی جس میں بڑے تکنیکی ڈیٹا کا تجزیہ اور بڑی تعداد میں گواہوں کی جانچ شامل تھی۔
بیان میں کہا گیا’’مقدمہ درج ہونے کے بعد، جموں کشمیر، ہریانہ، دہلی، بنگلورو سمیت تقریباً ۷۷ جگہوں پر تلاشی لی گئی اور جے کے ایس ایس بی کے بعض اہلکاروں سمیت ملزمین اور دیگر کے احاطے سے۲۰؍ افراد کو گرفتار کر کے۶۱ لاکھ ۷۹ہزار روپے نقد برآمدکئے گئے۔
بیان میں مزید کہا گیا کہ ایف آئی آر میں لگائے گئے دیگر الزامات پر بڑی سازش کا پتہ لگانے کے لیے مزید تفتیش جاری ہے۔