سرینگر//
جموں کشمیر پولیس نے گزشتہ ہفتے وسطی کشمیر کے بڈگام ضلع سے لاپتہ ہونے والی ایک خاتون اور اس کی دو سالہ بیٹی کا راجستھان سے سراغ لگایا ہے۔
پولیس کے ایک ترجمان نے بتایا کہ پولیس اسٹیشن بڈگام کو ۲۹؍ اکتوبر کو چاند پورہ بڈگام کے ایک رہائشی کی جانب سے اپنی بہن اور اس کی بیٹی کے لاپتہ ہونے کی تحریری شکایت موصول ہوئی تھی۔
گمشدگی کی رپورٹ درج کرنے کے بعد، پولیس نے ماں بیٹی کی جوڑی کا پتہ لگانے کے لیے اسٹیشن ہاؤس آفیسر، بڈگام کی نگرانی میں ایک خصوصی ٹیم تشکیل دی۔
ترجمان نے کہا’’تیزی سے کام کرتے ہوئے، خصوصی ٹیم نے کچھ معلومات پر کارروائی کرتے ہوئے مختلف مقامات پر چھاپے مارے اور سخت کوششوں کے بعد خصوصی ٹیم نے راجستھان سے لاپتہ جوڑی کا سراغ لگایا‘‘۔
اس کے بعد پولیس دونوں کو گھر واپس لے آئی۔
پولیس ترجمان نے کہا’’تمام قانونی تقاضوں کو پورا کرنے کے بعد، ماں بیٹی کی جوڑی کو ان کے خاندان کے حوالے کر دیا گیا‘‘۔
پولیس نے اس بارے میں کچھ نہیں بتایا کہ دونوں راجستھان کیسے اور کیوں پہنچ گئی تھیں۔پولیس نے کہا کہ اس معاملے کی مزید تفتیش جاری ہے۔