اننت ناگ : دو غیر مقامی مزدو فائرنگ میں زخمی

سرینگر//
پولیس نے کہا ہے کہ جنوبی اننت ناگ ضلع کے ایک اسکول میں کام کرنے والے غیر مقامی مزدوروں کو جمعرات کو ملی ٹنٹوں نے گولی مار کر زخمی کر دیا۔
جموں و کشمیر پولیس کے مطابق متاثرین بوندیالگام علاقے میں ایک پرائیویٹ سکول میں کام کر رہے تھے۔ متاثرین میں سے ایک کا تعلق بہار سے ہے جبکہ دوسرا پڑوسی ملک نیپال سے ہے۔ انہیں ہسپتال میں داخل کرایا گیا۔
کشمیر زون کی پولیس نے ایک ٹویٹ میں کہا’’دہشت گردوں نے دو غیر مقامی مزدوروں (ایک بہار سے اور دوسرا نیپال سے) پر گولی چلا دی، جو ضلع اننت ناگ کے بونڈیا گام میں ایک نجی اسکول میں کام کر رہے تھے۔ دونوں کو ہسپتال منتقل کیا جا رہا ہے‘‘۔
اس دوران فورسز نے حملہ آوروں کو پکڑنے کیلئے پورے علاقے کو گھیرے میں لے لیا ہے۔
کشمیر صوبے کے ایڈیشنل ڈائریکٹر جنرل آف پولیس ‘ وجے کمار نے واقعہ پر اپنے ایک ٹویٹ میں کہا ’’ یہ دہشت گردی کا ایک بزدلانہ اور غیر انسانی فعل ہے۔ دہشت گردوں نے مزدوروں کو کسی کام میں مصروف ہونے کے لیے بلایا ۔ ایک بار جب دونوں باہر آئے تودہشت گرد نے ان پر پستول سے فائرنگ کردی۔ ہم اولین ترجیح پر تحقیقات کر رہے ہیں۔ مجرم کو جلد انصاف کے کٹہرے میں لایا جائے گا۔‘‘