سرینگر//
شہر آفاق گلمرگ کے افروٹ پہاڑی علاقے میں راستہ بھٹکنے والے تین سیاحوں کو پولیس نے بچا لیا۔
سرکاری ذرائع نے بتایا کہ گلمرگ پولیس کو گزشتہ شب اطلاع موصول ہوئی کہ افروٹ علاقے میں تین سیاح پھنس کر رہ گئے ہیں۔
معلوم ہوا ہے کہ گلمرگ پولیس نے فوری طورپر بچاؤ کارروائی کا آغاز کیا جس دوران تینوں سیاحوں کو ڈھونڈ نکال کر اُنہیں محفوظ مقام کی اور منتقل کیا گیا۔
سرکاری ذرائع نے سیاحوں کی شناخت راجو، اننیا اور بھردواج ساکنان حیدر آباد کے بطور کی ہے ۔
دریں اثنا سیاحوں نے پولیس کارروائی پر اطمینان کا اظہار کرتے ہوئے بتایا کہ گزشتہ شام افروٹ کی سیر و تفرح کی خاطر پیدل سفر شروع کیا جس دوران راستہ بھٹکنے کے باعث وہ پہاڑی پر پھنس کر رہ گئے ۔
سیاحوں نے بتایا کہ ایس ایچ او گلمرگ کو فون کیا جس دوران پولیس ٹیم فوری طورپر جائے موقع پر پہنچی اور ہمیں بچا لیا گیا۔
سیاحوں نے پولیس کی اس کارروائی کو خوب سراہا ہے ۔