سرینگر//
پولیس نے جنوبی کشمیر کے ضلع پلوامہ کے کھامری چوک میں لشکر طیبہ سے وابستہ ایک جنگجو اعانت کار کو گرفتار کرنے کا دعویٰ کیا ہے ۔
ایک پولیس ترجمان نے اپنے ایک بیان میں کہا کہ پلوامہ پولیس، فوج کی۴۴آر آر اور سی آر پی ایف کی۱۸۳ویںبٹالین کی ایک مشترکہ ٹیم نے پلوامہ کے کھامری چوک میں ناکے دوران لشکر طیبہ سے وابستہ ایک جنگجو اعانت کار کو گرفتار کیا۔
ترجمان نے گرفتار شدہ جنگجو اعانت کار کی شناخت زبیر احمد ڈار ولد علی محمد ڈار ساکن آری گام پلوامہ کے بطور کی۔
بیان میں کہا گیا کہ گرفتار شدہ کی تحویل سے ایک ہینڈ گرینیڈ بھی بر آمد کیا گیا۔ترجمان نے کہا’’گرفتار شدہ لشکر طیبہ کا اعانت کار تھا اور اس کو علاقے میں سیکورٹی فورسز اور غیر مقامی مزدوروں پر حملے کرنے کا کام سونپا گیا تھا‘‘۔
پولیس ترجمان نے کہا کہ اس سلسلے میں پولیس اسٹیشن پلوامہ میں ایک کیس درج کرکے مزید تحقیقات شروع کی گئی ہیں۔