نئی دہلی// وزیر اعظم نریندر مودی نے بدھ کو کہا کہ ہم نے دہلی کی جھگی جھونپڑیوں میں رہنے والے غریبوں کو پکے مکانات فراہم کرنے کے اپنے عزم میں بدھ کو ایک اہم سنگ میل طے کیا ہے ۔
مسٹر مودی نے راجدھانی کے وگیان بھون میں منعقدہ ایک پروگرام سے خطاب کیا جہاں دہلی کی جھگی بستیوں میں رہنے والے کنبوں کو نئے فلیٹ تقسیم کیے گئے ۔ مرکزی وزیر ہردیپ سنگھ پوری، محترمہ میناکشی لیکھی اور دیگر معززین پروگرام کے ڈائس پر موجود تھے ۔
انہوں نے کہا کہ مرکزی حکومت دہلی کو ملک کی راجدھانی کے مطابق اسے ایک شاندار، سہولیات سے لیس شہر بنانا چاہتی ہے ۔
دہلی کا غریب یا متوسط [؟][؟]طبقہ ترقی کی خواہش رکھتا ہے اور وہ ہنر سے بھرا ہوا ہے ۔ اس کی سہولت، اس کی خواہشات کی تکمیل حکومت کی اولین ترجیح ہے ۔
اپنی حکومت کو غریبوں کی حکومت قرار دیتے ہوئے مسٹر مودی نے کہا، ”آج دہلی کے ہزاروں غریب لوگوں کے لیے بہت بڑا دن ہے ۔ جو برسوں سے دہلی کی جھگیوں میں رہ رہے تھے ، آج ان کے لیے ایک نئی شروعات ہے ۔
مسٹر مودی نے کہا کہ یہ ایک مہم ہے جس سے دہلی کے ہزاروں غریب خاندانوں کے خواب پورے ہوں گے ۔
انہوں نے کہا کہ آج ملک میں جو حکومت ہے وہ غریبوں کی حکومت ہے اس لیے وہ غریبوں کو ان کے حال پر نہیں چھوڑ سکتی۔
انہوں نے کہا کہ آج ملک کے پالیسی فیصلوں کے مرکز میں غریب ہیں۔ حکومت شہر میں رہنے والے غریب بہن بھائیوں پر بھی یکساں توجہ دے رہی ہے ۔ حکومت کے مطابق دہلی میں جھگی جھونپڑیوں میں رہنے والے غریبوں کو فلیٹ دینے کے جاری منصوبے کا پہلا مرحلہ مکمل ہو گیا ہے ۔ اس اسکیم میں 3024 فلیٹس مکمل طور پر تیار ہیں۔ یہ تقریباً 345 کروڑ روپے کی لاگت سے تعمیر کیے گئے ہیں اور انہیں تمام شہری سہولیات فراہم کی گئی ہیں۔ ان فلیٹس میں کچن میں ٹائلیں، سبز ماربل کاؤنٹر لگے ہوئے ہیں۔ کیمپس میں کمیونٹی پارک، الیکٹرک سب اسٹیشن، سیوریج ٹریٹمنٹ پلانٹ، پائپ لائن جیسی عوامی سہولیات ، صاف پانی کی فراہمی، لفٹ، زیر زمین پانی کی ٹینک جیسی سہولیات فراہم کی گئی ہیں۔
مسٹر مودی نے کہا کہ دہلی کے لاکھوں غریبوں کی زندگی حکومت کی طرف سے شروع کی گئی ‘ایک قوم، ایک راشن کارڈ’ کی سہولت سے آسان ہو گئی ہے ۔ کورونا وبا کے عالمی بحران کے وقت مرکزی حکومت گزشتہ دو برسوں سے دہلی کے لاکھوں غریبوں کو مفت راشن بھی دے رہی ہے ۔
انہوں نے دہلی میں شہری سہولیات اور شہری بنیادی ڈھانچے کو بہتر بنانے کے لئے پچھلے آٹھ برسوں میں کئے گئے کام کا بھی ذکر کیا اور کہا کہ دہلی-این سی آر میں میٹرو نیٹ ورک 2014 میں 190 کلومیٹر تھا جو آج دوگنا سے بڑھ کر 400 کلومیٹر تک پھیل چکا ہے ۔