یوکرین سے اناج برآمدگی کا سلسلہ جاری رہنا چاہیے، اقوام متحدہ

جنیوا//
اقوام متحدہ کا کہنا ہے کہ یوکرین سے اناج برآمد کرنے کے معاہدے کے تحت اناج برآمدگی کا سلسلہ جاری رہنا چاہیے۔
یوکرین سے اناج برآمد کرنے کے معاہدے میں اقوام متحدہ کے کوارڈینیٹر نے اپنے جاری کردہ بیان میں کہا ہے کہ سویلین کارگوشپ فوجی اہداف کا نشانہ نہیں بن سکتے اور نہ ہی انہیں یرغمال بنایا جاسکتا ہے۔اقوام متحدہ کے کوارڈینیٹر امیر عبداللہ کا یہ بیان اقوام متحدہ، ترکی اور یوکرین کی جانب سے ٹرانزٹ پلان پر زور دینے کے بعد جاری کیا گیا ہے۔
واضح رہے کہ روس گزشتہ دنوں یوکرین سے اناج برآمد کرنے کے معاہدے سے دستبرداری کا اعلان کرچکا ہے۔
روس کا کہنا ہے کہ بحیرہ اسود میں روسی بیڑے پر حملے کے بعد سویلین شپس کے تحفظ کی ضمانت نہیں دے سکتے۔
تاہم اقوام متحدہ کا کہنا ہے کہ روس کی جانب سے معاہدے سے دستبرداری کے باوجود مذکورہ معاہدے کے تحت یوکرین سے اناج برآمد کرنے کا سلسلہ جاری رہنا چاہیے۔