حیدرآباد//وزیر تجارت پیوش گوئل نے ملک کی کاروباری برادری پر زور دیا ہے کہ وہ گھریلو مارکیٹ میں تیار کردہ مصنوعات کو ترجیح دیں تاکہ گھریلو مینوفیکچرنگ کو فروغ ملے ۔ وہ ہفتہ کو یہاں آل انڈیا ویش فیڈریشن (اے آئی وائی ایف) سے خطاب کررہے تھے ۔
انہوں نے اس موقع پر یہ بھی کہا کہ بہت سے ترقی یافتہ ممالک ہندوستان کے ساتھ آزاد تجارتی معاہدہ (ایف ٹی اے ) کرنے کے لیے تیار ہیں۔ انہوں نے ملک کے نوجوانوں کو اختراعی اور کاروباری بننے کی ترغیب دی جس کا مقصد لوگوں کی روزمرہ کی ضروریات کو پورا کرنا آسان بنانا ہے ۔
وزیر تجارت نے ہندوستان میں صنعت اور تعمیراتی کام کی حوصلہ افزائی کرنے کی ضرورت پر زور دیا اور کہا کہ اس سے روزگار میں اضافہ ہوگا اور ہمارے شہریوں کی زندگیوں میں خوشحالی آئے گی۔
واضح رہے کہ وزیر اعظم نریندر مودی نے ملک میں گھومنے پھرنے جانے والے مسافروں اور سیاحوں سے کہا تھا کہ وہ اپنے سفری بجٹ کا کم از کم پانچ فیصد مقامی مصنوعات کی خریداری میں خرچ کریں۔ اس کال کا خیرمقدم کرتے ہوئے مسٹر گوئل نے کہا کہ ہمارے باصلاحیت کاریگر اور صنعت کار حمایت اور حوصلہ افزائی کے مستحق ہیں۔
انہوں نے کہا کہ گزشتہ 30 سالوں میں ہندوستان کی جی ڈی پی میں 11.8 گنا اضافہ ہوا ہے ۔ لیکن اب حکومت کی طرف سے ساختی اصلاحات پر تفصیلی توجہ دینے کی وجہ سے صورتحال بہت بدل چکی ہے ۔ جس کی وجہ سے لوگوں کو بنیادی ضروریات زندگی کی جدوجہد سے آزادی مل رہی ہے ۔
انہوں نے کہاکہ "حکومت نے صفائی کو فروغ دیتے ہوئے 12 کروڑ سے زیادہ بیت الخلا بنا کر لوگوں اور ہر گھر کی بنیادی ضروریات کو پورا کرنے میں کامیابی حاصل کی ہے ۔ بات صرف بیت الخلاء کی تھی لیکن اس نے سب کی اور خاص کر خواتین کی عزت نفس کو برقرار رکھا۔’’