پرتھ//آسٹریلیا نے مارکس اسٹوئنس (ناٹ آؤٹ 59) کی دھماکہ خیز نصف سنچری کی مدد سے آئی سی سی ٹی 20 ورلڈ کپ 2022 کے سپر 12 مرحلے میں سری لنکا کو سات وکٹوں سے شکست دے دی۔
سری لنکا نے چاریتا اسلانکا (38 ناٹ آؤٹ) کی اہم اننگز کی بدولت آسٹریلیا کو 158 رن کا ہدف دیا جسے آسٹریلیا نے 16.3 اوورز میں حاصل کر لیا۔ پہلے میچ میں نیوزی لینڈ کے ہاتھوں 89 رن کی زبردست شکست کے بعد اس جیت نے آسٹریلیا کو پہلے میچ میں سیمی فائنل کی دوڑ میں دوبارہ زندہ کر دیا ہے۔
ہدف کے تعاقب میں آسٹریلیا نے سست آغاز کیا۔ ڈیوڈ وارنر (11) اور مچل مارش (17) مختصر جدوجہد کے بعد پویلین لوٹ گئے۔ گلین میکسویل نے رن ریٹ بڑھانے کی کوشش میں 12 گیندوں پر دو چوکوں اور دو چھکوں کی مدد سے 23 رن بنائے لیکن باؤنڈری پر آشین بندارا کے شاندار کیچ کے باعث انہیں پویلین لوٹنا پڑا۔
سری لنکا نے 13ویں اوور تک آسٹریلیا کے رن ریٹ کو قابو میں رکھا جبکہ کنگاروز کو جیت کے لیے سات اوورزمیں 61 رن درکار تھے۔ پانچویں نمبر پر بیٹنگ کے لیے آتے ہوئے، اسٹوئنس نے 18 گیندوں پر چار چوکوں اور چھ چھکوں کی مدد سے تیز 59 رن بنائے اور آسٹریلیا کو 21 گیندیں باقی رہتے ہدف تک پہنچنے میں مدد کی۔ کپتان ایرون فنچ نے 17ویں اوور کی تیسری گیند پر فاتحانہ رن بنا کر آسٹریلیا کو فتح دلائی۔ فنچ نے اسٹوئنس کا ساتھ دیتے ہوئے 31 رن بنائے، حالانکہ اس کے لیے انہوں نے 42 گیندیں کھیلی تھیں۔
اسٹونیس نے 17 گیندوں پر نصف سنچری مکمل کرکے ٹی ٹوئنٹی ورلڈ کپ کی دوسری تیز ترین نصف سنچری اسکور کی، جب کہ تیز ترین نصف یوراج سنگھ نے 2007 کے ورلڈ کپ میں انگلینڈ کے خلاف 12 گیندوں پر بنائی تھی۔ یہ آسٹریلیا کے لیے ٹی 20 انٹرنیشنل میں بنائی گئی سب سے تیز نصف سنچری بھی ہے۔
اس سے قبل سری لنکا نے ٹاس جیت کر بیٹنگ کرتے ہوئے محض چھ رن پر کوسل مینڈس کا وکٹ گنوا دیا۔ سلامی بلے باز پتھم نسانکا نے دھننجے ڈی سلوا کے ساتھ دوسری وکٹ کے لیے 69 رن جوڑے لیکن دونوں ہی اننگز کی رفتار نہ بڑھا سکے۔ نسانکا نے 45 گیندوں پر 40 جبکہ ڈی سلوا نے 23 گیندوں پر 26 رنز بنائے۔ بھانوکا راجا پکسے، داسن شناکا اور ونیندو ہسرنگا نے مایوس کیا، وہیں اسلنکا نے وکٹ پر قدم جمانے کے بعد تیز رنز جوڑے۔ اسلنکا نے 25 گیندوں پر تین چوکوں اور دو چھکوں کی مدد سے ناٹ آؤٹ 38 رن بنائے جبکہ چمیکا کرونارتنے نے سات گیندوں میں 14 رنوں کا ساتھ دیا۔ دونوں نے آخری دو اووروں میں 31 رن جوڑے اور سری لنکا کو 20 اوور میں 157/6 کے اسکور تک پہنچا دیا۔