دو دنوں تک بند رہنے کے بعدمغل شاہراہ پر ٹریفک بحال

راجوری//
برف صاف کرنے کے کام کی تکمیل کے ساتھ ہی، پونچھ ضلع کو وادی کشمیر سے جوڑنے والی مغل روڈ کو جمعہ کو گاڑیوں کی آمدورفت کے لیے بحال کر دیا گیا۔
حکام کاکہنا ہے کہ پیر پنجال ریجن کے بالائی علاقوں میں برف باری کے بعد جمعرات کی صبح سڑک کو بند کر دیا گیا۔ دن بھر بند رہنے کے بعد جمعہ کی شام کو سڑک کو ٹریفک کے لیے بحال کر دیا گیا۔
ڈپٹی ایس پی ٹریفک راجوری پونچھ رینج، آفتاب شاہ نے بتایا’’سڑک کو برف سے صاف کر کے ٹریفک کے لیے بحال کر دیا گیا ہے‘‘۔
شاہ نے کہا کہ پہلے مرحلے میں ہلکی موٹر گاڑیاں (ایل ایم ویز) اور پھنسی ہوئیں گاڑیوں کو جانے کی اجازت دی جا رہی ہے۔انہوں نے لوگوں کو مشورہ دیا کہ وہ شام کے اوقات میں پھسلن کی وجہ سے کٹ آف ٹائمنگ پر سختی سے عمل کریں۔
ادھر وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر ٹریفک کی نقل و حمل حسب معمول جاری ہے ۔
ٹریفک حکام کا کہنا ہے کہ قومی شاہراہ پر ٹریفک کی نقل و حمل جاری ہے ۔انہوں نے کہا کہ جمعے کے روز ٹریفک کو منی مرگ سے سری نگر کی طرف روانہ ہونے کی اجازت ہے ۔