محبوبہ کو گپکار کی سرکاری رہائش گاہ خالی کرنے کا حکم

سرینگر//
جموں کشمیر انتظامیہ نے پیپلز ڈیموکریٹک پارٹی( پی ڈی پی) کی صدر اور سابق وزیر اعلیٰ محبوبہ مفتی کو گپکار روڈ پر واقع سرکاری رہائش گاہ خالی کرنے کیلئے نوٹس جاری کیا ہے ۔
ذرائع کے مطابق اسٹیٹ محکمے نے پی ڈی پی صدر محبوبہ مفتی کو گپکار روڈ پر واقع سرکاری رہائش گاہ خالی کرنے لئے نوٹس جاری کیا ہے ۔
محبوبہ مفتی کا خاندان اس انتہائی ہائی سیکورٹی والی رہائش گاہ میں ۲۰۰۵میں مفتی محمد سعید کے وزیر اعلیٰ کا عہدہ چھوڑنے کے بعد سے قیام پذیر تھا۔
حکومتی ذرائع کے مطابق حکومت ہند کی طرف سے۲۰۲۰میں ریاستی قانون میں ترمیم کے بعد سابق وزرائے اعلیٰ اب سرکاری رہائش گاہوں کے حقدار نہیں ہیں۔
معلوم ہوا ہے کہ موصوفہ کو اس فئیر ویو رہائش گاہ کے بدلے ایک متبادل رہائش گاہ کی پیش کش کی گئی ہے ۔اس سلسلے میں محکمہ اسٹیٹس کی نوٹس میں کہا گیا ہے ’’ آپ کو آگاہ کیاجاتا ہے کہ اگر آپ کو کسی متبادل رہائش کی ضرورت ہے، تو حکومت آپ کی درخواست پر، سیکورٹی یا کسی اور بنیاد پر فراہم کرنے کے لیے تیار ہے۔‘‘
نوٹس کے ردعمل پر محبوبہ کاکہنا ہے کہ وہ اپنے وکلاء کی ٹیم سے مشارت کریں گی ۔ انہوں نے کہا کہ یہ رہائشگاہ حکومت نے مفتی سعید کو اس وقت الاٹ کی جب وہ ۲۰۰۵ میں وزیر اعلیٰ نہیں رہے تھے ۔
بتادیں کہ گپکار روڈ پر واقع فئیر ویو ۱۹۸۹تک سرکاری گیسٹ ہاؤس کے بطور استعمال کیا جاتی تھا‘۱۹۹۰میں اس کو باڈر سیکورٹی فورسز (بی ایس ایف) نے اپنے قبضے میں لے لیا اور اس کو پاپا۲کا نام دیا‘جہاں گرفتار جنگجوؤں اور مشتبہ افراد کا انٹروگیشن کیا جاتا تھا ۔
سال ۱۹۹۶میں جموں وکشمیر کے سابق چیف سکریٹری اشوک جیٹلی اس میں رہائش پذیر ہوئے اور بعد میں سال ۲۰۰۳میں اس کی سر نو تزئین و آرائش کی گئی اور اس وقت کے وزیر خزانہ مظفر حسین بیگ اس میں رہائش پذیر ہوگئے ۔