بدعنوانی کی سزا سے بچنے کے لیے کانگریس، اے اے پی نے ستیہ گرہ کا سہارا لیا: بی جے پی

نئی دہلی// بھارتیہ جنتا پارٹی (بی جے پی ) نے عام آدمی پارٹی (آپ) اور کانگریس کو بدعنوانی اور چالبازیوں کے معاملے میں ایک جیسی پارٹی قرار دیتے ہوئے آج کہا کہ دونوں پارٹیاں بدعنوانی کی سزا سے بچنے کے لیے ستیہ گرہ کا سہارا لیتی ہیں۔
یہاں پارٹی ہیڈکوارٹر میں ایک پریس کانفرنس سے خطاب کرتے ہوئے ، بی جے پی کے ترجمان سمبت پاترا نے کہا، "سچ کہوں تو، کانگریس اور عام آدمی پارٹی کی چالیں حقیقی معنوں میں ایک ہی قسم کی ہیں۔ جس طرح کا ڈرامہ آج عام آدمی پارٹی کر رہی ہے ، آپ کو یاد ہوگا، کچھ دن پہلے ایسا ہی منظر راہل گاندھی اور کانگریس پارٹی کا دیکھا جا رہا تھا۔
مسٹر پاترا نے کہا کہ جب راہل گاندھی کو بدعنوانی کے معاملے میں بلایا گیا تھا، اس وقت کانگریس پارٹی ٹھیک اسی طرح ڈرامہ اور مظاہروں میں لگی ہوئی تھی۔ اس جشن کو کرپشن کہا جائے تو مبالغہ آرائی نہیں ہو گی۔ پہلے بدعنوانی کیجئے ، ، دلالی کیجئے اور جب آپ سے سوال پوچھا جاتا ہے تو آپ جشن مناتے ہیں۔ انہوں نے کہا، ‘‘آج سخت گیر بے ایمان جماعتیں ‘‘جشنِ بدعنوانی’’ کا جشن منا رہی ہیں۔ پہلے بدعنوانی کرو،دلالی کرو اور جب سوال ہو تو جشن مناؤ۔
ڈاکٹر پاترا نے کہا ”میں منیش سسودیا جی سے پوچھنا چاہتا ہوں کہ آپ وہی پارٹی ہیں جس نے انا ہزارے جی کے ساتھ مل کر بدعنوانی کے خلاف تحریک چلائی تھی۔ پورے ہندوستان میں آپ نے عہد کیا تھا کہ ہم بدعنوانی کے خلاف لڑیں گے ۔ عام آدمی پارٹی اتنی بڑی چالباز پارٹی ہے کہ جو لوگ بدعنوانی کے خلاف لڑنے آئے تھے وہ آج سب سے زیادہ بنیاد پرست بے ایمان پارٹی بن کر ابھرے ہیں۔
بی جے پی ترجمان نے کہا کہ آج کل ایک نیا ٹرینڈ شروع ہوا ہے ۔ جب بدعنوانوں کو پوچھ تاچھ کے لیے بلایا جاتا ہے تو وہ سب سے پہلے راج گھاٹ جاتے ہیں کہ ہم ستیہ گرہ کریں گے ۔ انہوں نے کہا کہ ستیہ گرہ اور بدعنوانی کا کوئی تال میل نہیں ہے ۔ یہ شہید بھگت سنگھ کی توہین ہے اور بابائے قوم مہاتما گاندھی کی بھی توہین ہے ۔ مسٹر راہل گاندھی بھی وہاں گئے اور مسٹر منیش سسودیا بھی وہاں گئے ہیں۔