برسبین//ہندوستان نے کے ایل راہل (57) اور سوریہ کمار یادو (50) کی نصف سنچریوں کے بعد آخری اوور میں محمدسامی کی شاندار گیند بازی کی بدولت آئی سی سی ٹی- 20 ورلڈ کپ 2022 کے وارم اپ میچ میں پیر کے روز آسٹریلیا کو چھ رنز سے شکست دے دی ہندوستان نے آسٹریلیا کو 20 اوور میں 187 رنز کا ہدف دیا جس کے جواب میں آسٹریلیا کی ٹیم 180 رنز پر آل آؤٹ ہوگئی۔
187 رنز کے ہدف کے تعاقب میں آسٹریلیا نے 18 اوورز میں چار وکٹ کے نقصان پر 171 رنز بنائے اور اسے جیت کے لیے 12 گیندوں پر 16 رنز درکار تھے۔ ہرشل پٹیل نے 19ویں اوور میں ایرون فنچ (79) کو پانچ رنز پر آؤٹ کیا جب کہ دھماکہ خیز بلے باز ٹم ڈیوڈ رن آؤٹ ہوگئے۔ کپتان روہت شرما نے آخری اوور میں 11 رنز کے دفاع کی ذمہ داری محمد سامی کو دی جنہوں نے گزشتہ ایک سال سے ایک بھی ٹی- ٹوئنٹی انٹرنیشنل نہیں کھیلا ہے۔ سامی نے اس اوور میں صرف چار رنز دے کر تین وکٹیں حاصل کیں جب کہ ایشٹن ایگر کے رن آؤٹ ہونے کے ساتھ آسٹریلیا ٹیم 180 رنز پر آل آؤٹ ہو گئی۔
اس سے قبل کے ایل راہل نے 33 گیندوں پر چھ چوکوں اور تین چھکوں کی مدد سے 57 رنز بنا کر ہندوستان کو مضبوط اسکور تک پہنچایا جبکہ سوریہ کمار نے 33 گیندوں پر چھ چوکوں اور ایک چھکے کی مدد سے 50 رنز بنائے۔