لالبازا رمیں دو بھتہ خور گرفتار، نقلی پستول‘ خنجر ضبط:پولیس

سرینگر//
پولیس کا کہنا ہے کہ اس نے سرینگر کے لال بازار علاقے میں دو بھتہ خوروں کو ایک نقلی پستول‘ایک خنجر اور دیگر کچھ قیمتی چیزوں کے ساتھ گرفتار کیا ہے ۔
پولیس ترجمان نے اپنے ایک بیان میں کہا کہ لال بازا پولیس اسٹیشن کو سید عباس حسین ساکن باغوان پورہ لال بازار کی طرف سے ایک شکایت موصول ہوئی جس میں کہا گیا کہ گیارہ اور بارہ اکتوبر کی درمیانی شب اس کو مولوی سٹاپ لال بازار پر دو نامعلوم پستول اور خنجر بر دار افراد نے روکا۔
ترجمان نے کہا’’شکایت کنندہ کے مطابق ان دو افراد نے اس کو گاڑی میں بٹھا کر نالہ بل علاقے میں پہنچایا جہاں سے وہ اس سے نقدی رقم اور کچھ قیمتی چیزیں لوٹ کر چلے گئے ‘‘۔
بیان میں کہا گیا کہ اس شکایت پر پولیس اسٹیشن لال بازار میں ایک کیس درج کرکے تحقیقات شروع کی گئی۔
پولیس ترجمان نے کہا کہ اس ضمن میں تحقیقاتی عمل کو تیزی سے انجام دینے کیلئے ایس ڈی پی او حضرت بل اظہر رشید کی قیادت میں ایک ٹیم تشکیل دی گئی۔انہوں نے کہا کہ پولیس ٹیم نے تیکنیکی و انسانی وسائل کی مدد سے دو نوں ملزموں کو گرفتار کرنے میں کامیابی حاصل کی۔
بیان کے مطابق ملزموں کی شناخت ارسلان منظور ڈار ولد منظور احمد ڈار اور باصر بشیر ڈار ولد بشیر احمد ڈار ساکنان اونتا باوان صورہ کے بطور کی گئی ہے ۔
بیان میں کہا گیا کہ گرفتار شدگان کی تحویل سے ایک پستول، جو بظاہر نقلی لگتا ہے ، ایک خنجر، موبائل فون اور دیگر کچھ قیمتی چیزیں بر آمد کی گئیں۔