ابتدائی غلطیوں کی وجہ سے میچ ہارے: ڈینربی

بھونیشور، // ہندوستانی خواتین کی انڈر۔17 فٹ بال ٹیم کے ہیڈ کوچ تھامس ڈینربی نے فیفا انڈر۔17 خواتین ورلڈ کپ 2022 میں اپنے افتتاحی میچ میں امریکہ سے (8-0) سے ہارنے کے بعد اعتراف کرتے ہوئے کہا کہ ابتدائی میچ کی غلطیاں اس کی شکست کی وجہ بن گئیں۔
ڈینربی نے کہاکہ "میرا ماننا ہے کہ لڑکیاں مخالفین کے سامنے تھوڑا بہت دباؤ میں تھیں۔ یہ ان کا پہلا ورلڈ کپ میچ تھا۔ وہ دباؤ کو ہینڈل نہیں کر سکیں۔ اس سطح پر اور ایسے مخالفین کے خلاف جذبات پر قابو پانا بہت زیادہ مشکل ہے۔
ٹائٹل کے متلاشی امریکہ نے منگل کی رات یہاں کالنگا اسٹیڈیم میں ہندوستان کو 8-0 سے شکست دی۔
63 سالہ سویڈش کوچ نے کہاکہ "ہم نے اب تک کی بہترین ٹیم کے ساتھ کھیلا اور یہ ہمارے لیے واقعی مشکل تھا۔ ہم گیند کو پاس کرنے کے لیے کافی پر اعتماد نہیں تھے اور انہوں نے کھیل کے شروع میں کچھ غلطیاں کیں جس نے واقعی ہماری کارکردگی کو متاثر کیا۔”
دوسری جانب ہندوستانی کپتان استم اوراون نے 0-8 کی یکطرفہ شکست کے بعد ٹیم کی غلطیوں کا اعتراف کرتے ہوئے کہا کہ ہم جانتے ہیں کہ ہم ان کے سامنے اتنے اچھے نہیں تھے، ان کی رفتار، ہائی پریشر کی حکمت عملی سمیت ہر چیز ہم سے مضبوط تھا۔
انہوں نے کہا کہ ہم نے میچ سے بہت کچھ سیکھا ہے اور اپنے کمزور شعبوں پر کام کرتے ہوئے ہم اپنے اگلے میچ میں بہتر کارکردگی دکھانے کی کوشش کریں گے۔
ہندوستان اپنے اگلے میچ میں جمعہ کو مراکش کی انڈر۔17 ٹیم کا سامنا کرے گا جو ہندوستان کی طرح اپنا پہلا ورلڈ کپ کھیل رہی ہے۔
جب کوچ ڈینربی سے پوچھا گیا کہ وہ اگلے میچ سے پہلے کھلاڑیوں کی حوصلہ افزائی کیسے کریں گے تو انہوں نے کہا کہ کوچ کا چہرہ بھی کھلاڑی کا چہرہ ہوتا ہے اس لیے میں مسکراتا رہوں گا اور ہر طرح سے ان کی حمایت کروں گا۔ میں نے لاکر روم سے لڑکیوں سے بات کی اور کہا کہ لڑکیو! ’سورج پھر بھی نکلے گا اور ہماری ایک نئی صبح ہوگی۔‘ ہمیں شکست کو قبول کرنا ہوگا اور مضبوطی کے ساتھ واپسی کرنی ہوگی۔