نئی دہلی// مرکزی تفتیشی بیورو (سی بی آئی) نے جمعرات کو کہا کہ اس نے منشیات کے بین الاقوامی نیٹ ورک کے خلاف کریک ڈاؤن کرنے کے لیے ایک کثیر جہتی آپریشن شروع کیا ہے ، جس میں منشیات کی اسمگلنگ سے متعلق انٹیلی جنس کا اشتراک شامل ہے اور انٹرپول کے ذریعے قانون کے نفاذ کا ایک مربوط عمل جیسی چیزوں کو شامل کیا گیا ہے ۔
یہاں ایک بیان میں سی بی آئی نے کہا کہ ‘آپریشن گروڈ’ کے نام سے اس آپریشن کا مقصد بین الاقوامی سطح پر منشیات کی اسمگلنگ میں ملوث آپریٹرز، اراکین، پیداواری علاقوں اور اس سے منسلک عناصر کے خلاف کارروائی کرنا ہے ۔
بیان میں کہا گیا ہے کہ انٹرپول اور نارکوٹکس کنٹرول بیورو (این سی بی) کے ساتھ قریبی تال میل قائم کرنے کے لیے ایک عالمی مہم کا آغاز کیا گیا ہے تاکہ بحر ہند کے علاقے پر خصوصی توجہ مرکوز کرتے ہوئے منشیات اور سائیکو ٹراپک مادوں کی غیر قانونی اسمگلنگ سے نمٹا جا سکے ۔ منشیات کی اسمگلنگ کے بین الاقوامی نیٹ ورکس کو پکڑنے کے لیے بین الاقوامی سطح پر قانون کے نفاذ کی ضرورت ہوتی ہے ۔
سی بی آئی نے کہا کہ سی بی آئی اور این سی بی معلومات کے تبادلے ، تجزیہ اور آپریشنل معلومات حاصل کرنے کے لیے تمام ریاستوں اور مرکز کے زیر انتظام علاقوں کی پولیس کے ساتھ قریبی تال میل میں کام کر رہی ہیں۔ مہم کے دوران ہندستان کی کئی ریاستوں میں منشیات ضبط کی گئی ہیں اور متعلقہ لوگوں کو گرفتار کیا گیا ہے ۔ تقریباً 6600 مشتبہ افراد سے تفتیش کی گئی، 127 معاملات درج کیے گئے اور چھ مفروروں سمیت 175 افراد کو گرفتار کیا گیا ہے ۔