ریاسی میں ہائبرڈ جنگجو گرفتار اسلحہ و گولہ بارود بر آمد:پولیس

جموں//
پولیس نے جموں کشمیر کے ضلع ریاسی میں ایک ہائبرڈ جنگجو کو گرفتار کرکے اس کی تحویل سے اسلحہ و گولہ بارود بر آمد کرنے کا دعویٰ کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ایک اطلاع پر کارروائی کرتے ہوئے پولیس نے ظفر اقبال ولد کریم بخش ساکن بال انگرالہ نامی ایک شخص کو گرفتار کیا جو پاکستانی جنگجو ہینڈلرس کے ساتھ رابطے میں تھا۔
بیان میں کہا گیا’’گرفتار شدہ ہائبرڈ جنگجو کا بھائی محمد اسحاق لشکر طیبہ سے وابستہ جنگجو تھا جس کو راجوری میں سیکورٹی فورسز کے ساتھ ایک تصادم میں مارا گیا تھا جبکہ اطلاعات کے مطابق اس کا ایک رشتہ دار عبدالرشید ساکن لادھ پاکستان میں ہے اور وہاں ملی ٹنٹوں کے ساتھ کام کر رہا ہے ‘‘۔
پولیس ترجمان نے کہا کہ پولیس کی ایک ٹیم نے ظفر اقبال کو پلاسو نولہ علاقے سے گرفتار کرکے اس کی پوچھ تاچھ کی۔انہوں نے کہا کہ دوران پوچھ تاچھ ظفر اقبال نے جنگجوؤں کے ساتھ رابطہ ہونے کے بارے میں اور جرائم انجام دینے کے بارے میں اعتراف کیا۔
ترجمان کا کہنا تھا کہ گرفتار شدہ کے انکشاف پر پولیس، فوج کی۵۸آر آر اور سی آر پی ایف کی۱۲۶بٹالین کی ایک مشترکہ ٹیم نے انگرالہ جنگل میں ایک آپریشن شروع کر دیا جس دوران ایک کمین گاہ سے اسلحہ و گولہ باردو بر آمد کیا گیا۔
بر آمد شدہ اسلحہ و گولہ بارود میں ایک پستول (گلاک)، چار پستول میگزین‘۲۲گولیاں اور ایک گرینیڈ شامل ہے ۔
پولیس ترجمان نے کہا کہ ظفر اقبال کے انکشاف پر ایک لاکھ۸۱ہزار رویے نقدی بھی بر آمد کئے گئے جس کو ملی ٹنسی سے متعلق سرگرمیوں کیلئے استعمال کرنا تھا۔
دریں اثنا ایس ایس پی ریاسی امت گپتا نے اس کو ایک بڑی کامیابی سے تعبیر کرتے ہوئے کہا کہ جنگجو ظفر اقبال ملی ٹنٹ تنظیموں کے ساتھ رابطے میں تھا اور اس کی گرفتاری سے ایک بڑی ملی ٹنٹ کارروائی کو ٹالا گیا۔
گپتا نے کہا کہ پاکستانی ہینڈلرس جموں وکشمیر میں ملی ٹنسی کو فروغ دینے کیلئے اپنی کوششیں جاری رکھے ہوئے ہیں۔