اپنے مطالبات کے حق میں محکمہ سریکلچر کے عارضی ملازموں کا سری نگر میں احتجاج

سرینگر///
جموںکشمیر سریکلچر کیجول ڈیلی ویجرس ایسو سی ایشن نے پیر کے روز یہاں پریس کالونی میں جمع ہو کر اپنے مطالبات خاص کر نوکریوں کو مستقل کرنے کے حق میں احتجاج درج کیا۔
مظاہرین نے ہاتھوں میں بینرس اٹھا رکھے تھے اور وہ جم کر نعرہ بازی کر رہے تھے ۔
اس موقع پر ایسو سی ایشن کے صدر غلام محی الدین شیخ نے میڈیا کے ساتھ بات کرتے ہوئے کہا کہ ہم نے اپنے مطالبات کو منوانے کیلئے۷۸گھنٹوں کے بھوک ہڑتال کا اعلان کیا ہے ۔
شیخ نے کہا کہ ہمارے ڈیلی ویجرس اور کیجول لیبررس بارہ مہینے کام کرتے ہیں لیکن انہیں دو یا تین مہینوں کی تنخواہ دی جاتی ہے اور اس میں بھی کٹوتی کی جاتی ہے ۔
ان کا کہنا تھا کہ ہمارے عارضی ملازموں کو نو ہزار روپیے ماہانہ تنخواہ کے بجائے دو سو یا تین سو روپے ماہانہ دئے جاتے ہیں۔
ایسو سی ایشن کے صدر نے کہا کہ ہمارے ساتھ کافی وعدے کئے گئے ایس آر او۵۲۰؍اور ایس آر او۶۴بھی لاگو کیا گیا لیکن ہمارے مطالبات حل نہیں کئے گئے ۔انہوں نے کہا کہ ہم اپنے بچوں کو پڑھا نہیں سکتے ہیں بلکہ ان کیلئے وردی بھی نہیں خرید پاتے ہیں۔
شیخ نے حکام سے منیمم ویجز ایکٹ لاگو کرنے اور ان کی نوکریوں کو مستقل کرنے کی اپیل کی۔