بی جے پی سیریل کلر کی طرح منتخب حکومتوں کو ہٹا رہی ہے : سسودیا

نئی دہلی// دہلی کے نائب وزیر اعلیٰ منیش سسودیا نے کہا کہ بی جے پی آج ایک سیریل کلر کی طرح عوام کے ذریعہ منتخب حکومت کو مارنے میں جتنی توانائی صرف کرتی ہے اس سے کم محنت میں بچوں کے لیے اسکول-اسپتال بنا کرلوگوں کو بہتر تعلیم اورعلاج فراہم کرسکتی ہے ۔
مسٹر سسودیا نے جمعہ کو دہلی قانون ساز اسمبلی کے خصوصی اجلاس میں کہا کہ بی جے پی آج ایک سیریل کلر کی طرح عوام کی طرف سے منتخب حکومتوں کو مارنے میں جتنی توانائی صرف کرتی ہے ، اس سے کم محنت میں بچوں کے لیے اسکول، اسپتال بنواکرلوگوں کو بہتر تعلیم-علاج فراہم کرسکتی ہے ۔ انہوں نے کہا کہ ہمیں دہلی کے لوگوں نے پیار سے منتخب کیا ہے ۔ ہمارے ساتھ دہلی کے عوام کے ووٹ کی طاقت ہے ۔ ہمیں کوئی نہیں خرید سکتا۔ یہی وجہ ہے کہ یہ لوگ میرے خلاف ایک بار نہیں ہزار بار چھاپے ماریں لیکن انہیں کچھ نہیں ملے گا۔ میرے خلاف ایک پیسے کی بھی بے ایمانی کا ثبوت نہیں ملے گا۔ میں نے ایمانداری سے کام کیا۔ بچوں کے لیے بہترین اسکول بنوائے ۔ دہلی میں تعلیم کا ایک شاندار ماحول تیارکیا۔
انہوں نے کہا کہ مسٹر کیجریوال اچھا کام کرنے پر حوصلہ افزائی کرتے ہیں اور وزیر اعظم نریندر مودی اچھے کام کرنے والوں کے گھر ریڈ ڈلواتے ہیں، فرضی ایف آئی آر کراتے ہیں۔ جہاں کوئی اچھا کام کرتا ہے وہاں وزیراعظم خود کو غیر محفوظ محسوس کرنے لگتے ہیں۔ یہی وجہ ہے کہ آزادی کے 75 سال بعد بھی ہندوستان تعلیم اور صحت کے میدان میں اتنا پسماندہ ہے کیونکہ ملک میں اچھے کام کرنے والوں کی حوصلہ افزائی کے بجائے انہیں کام کرنے سے روکا جاتا ہے ۔