ہمارے اسپنر کافی اچھے ہیں:متھالی

ہیملٹن//ہندوستانی کپتان متھالی راج نے بنگلہ دیش کے خلاف 110 رن کی بڑی جیت درج کرنے کے بعد منگل کو کہا کہ ہندوستانی اسپنر کافی بہتر ہیں۔ اس پچ سے انہیں مدد بھی ملی اور انہوں نے اس کا بھرپور فائدہ اٹھایا۔
متھالی نے میچ کے بعد کہا، ’’ہم نے ابتدائی وکٹ گنوانے کے بعد اچھی واپسی کی اور 230 رنز کا ہدف دیا۔ یاستیکا کی نصف سنچری کے بعد آخر میں ریچا گھوش، اسنیہ رانا اور پوجا وستراکر نے بھی کارآمد اننگز کھیلی۔ آل راؤنڈر ٹیم کے لیے ہمیشہ کارآمد ہوتا ہے، جو باؤلنگ بھی کر سکتا ہے اور ضرورت پڑنے پر نچلے آرڈرمیں اہم رنز بھی بنا سکتا ہے۔ سلیکٹرز بھی اس بات کو سمجھتے ہیں اور ہمیں اس اہم ٹورنامنٹ کے لیے آل راؤنڈر ملے ہیں۔
انہوں نے کہا، ’’ہمارے اسپنرز بہت اچھے ہیں اور اس پچ سے انہیں مددبھی ملی اور انہوں نے اس کا بھرپورفائدہ اٹھایا۔ ہماری ٹیم نے کرائسٹ چرچ میں ایک بھی میچ نہیں کھیلا ہے، جہاں ہمارا اگلا مقابلہ جنوبی افریقہ سے ہوگا۔ اس لیے ہمیں ہر شعبہ میں اچھا کام کرنا ہوگا۔
اپنی نصف سنچری کے لیے پلیئر آف دی میچ بننے والی یاستیکا بھاٹیہ نے کہا کہ وہ اپنی کارکردگی سے بہت خوش ہیں اور آنے والے میچوں میں ٹیم کے لیے مزید تعاون دینا چاہتی ہیں۔ ان کا کہنا تھا کہ وہ ہوم میچز اور نیٹس میں نمبر تین کے لیے ہی بیٹنگ کرنے کی پریکٹس کرتی ہیں، تاہم وہ ٹیم کے حالات کے مطابق اوپننگ کے لیے بھی تیار ہیں۔ یہ ان کا پہلا پلیئر آف دی میچ ایوارڈ ہے اور یہ ان کے لیے بہت معنی رکھتا ہے۔